Suku Tebabui, postu administrativu Bobonaro, munisípiu Bobonaro ne'ebe seidauk asesu eletrisidade. Imajen espesiál.

BOBONARO,05 novembru 2021 (TATOLI) — Uma-kain 280 hosi suku Tebabui, postu administrativu Bobonaro, munisípiu Bobonaro dezde okupasaun ilegál Indonézia to’o agora seidauk asesu enérjia eletrisidade.

Xefe Suku Tebabui, Agostinho Soares Maia, informa iha tinan 2012 governu halo ona instalasaun eletrisidade maibé kobre de’it uma-kain 78, restante kontinua hela iha nakukun laran.

“Ha’u-nia komunidade ne’e hamutuk  358 xefe família, sira-ne’ebé hela besik liña jerál hamutuk 78 ne’e mak asesu ona, maibé atu dehan de’it maoria mak seidauk asesu liña distribuisaun kada bairru, inklui sede suku no eskola até agora seidauk sente ahi naroman,” Xefe suku Tebabui informa ba Agência Tatoli, iha Maliana, sesta ne’e.

Nia haktuir, antes ne’e governu prioritiza komunidade suku Tebabui atu benifísia  tomak ba enérjia eletrisidade, maibé projetu ne’e hetan impedimentu hosi kompañia balun, entaun la kontinua halo instalasaun ba uma-kain hotu.

Ho preokupasaun ne’e, komunidade sira-ne’ebé iha kapasidade ekonomia sufisiente sosa rasik fiu, bolu tékniku EDTL halo instalasaun, enkuantu ba sira-ne’ebé kbiit la to’o kontinua sunu lampu tradisionál hodi fó naroman iha tempu kalan.

Komunidade Tabebui sosa rasik fiu instala eletrisidade tula deit iha ai-leten. Imajen epesiál.

“Fiu sira instala ne’e mós tula de’it iha ai-leten, tanba besi -riin laiha, ida-ne’e hanesan instalasaun urjente, maibé volume ahi mak la sufisiente entaun kalan ahi lakan kiik hanesan lilin la forsa ida, ida-ne’e bele estraga sasán eletróniku balu no  mós difikulta estudante sira atu estuda iha tempu kalan,” nia relata.

Xefe suku aprezenta beibeik preokupasaun ba EDTL munisípiu Bobonaro maibé to’o agora seidauk hetan resposta.

Nia rekomenda ba Governu konsidera Orsamentu Jerál Estadu (OJE) 2022 nune’e komunidade sira bele sente dezembolvimentu hanesan ho suku sira seluk.

Estrada aat

Xefe suku Tebabui ne’e fó-sai katak, kondisaun estrada mós sai problema boot tanba estrada ligasaun hosi suku ne’e to’o iha postu administrativu Bobonaro vila kuaze kilómetru 14 maibé kondisaun  estrada grave liu bainhira udan monu-rai.

kondisaun estrada ligasaun suku Tebabui ba postu administrativu Bobonaro no Maliana. Imajen espesiál.

“Governu tenke iha planu hadi’a dalan ne’e sira iha suku laran tanba estrada ne’e benefísia komunidade iha área rural. Iha suku ne’e mós maioria moris ho vida agrikultór hanesan kuda repollu, fehuk-ropa, koto, batar no modo sira seluk, atu lori ba merkadu Bobonaro vila no Maliana maibé kondisaun estrada ne’e mak aatliu,” nia tenik.

Suku Tebabui iha aldeia tolu mak hanesan, Ugas, Atupae no Tebabui ho totál populsaun hamutuk 1.976 no uma-kain 358.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here