UPM halo patrullamentu iha tasi. Imajen/Google

DILI, 05 novembru 2021 (TATOLI)— Komandante Administrasaun no Finansa Komandu Jerál Polísia Nasionál Timor-Leste (PNTL), Superintendente Xefe, José Soares, informa, Komandu PNTL prevee $100.000 hosi Orsamentu Jerál Estadu (OJE) 2021 hodi kontrata kompañia atu halo manutensaun ba ró Unidade Polisia Marítima (UMP) ne’ebé  avaria iha tempu badak.

“Ita prevee orsamentu $100.000 atu halo manutensaun ba ró Unidade Polisia Maritima nian,” Komandante Administrasaun PNTL ne’e hateten ba  Agência TATOLI,  hafoin ramata audénsia públika ho Komisaun B  iha Parlamentu Nasionál, sesta ne’e.

Kompañia ne’ebé manan na’in  ba konkursu públiku mak Tanjun Unipesoál Lda.

“Ita iha kompañia lokál ne’ebé maka manan iha konkursu ne’e, ha’u hanoin nia sei halo manutesaun ba ro hirak ne’e iha tempu badak,” nia kompromete

Entretantu, Peskizadór Fundasaun Mahein (FM), Sancho Xavier, hateten, ró ne’ebé maka ajuda UPM halo serbisu operasaun no kontrolu ba atividade sira iha tasi-laran avaria ona besik fulan-haat.

“Oinsá maka ita atu garante prevene polusaun marítima no knaar proteje rikusoin iha tasi timór,” Peskizadór ne’e afirma.

FM monitoriza hahú tinan 2020 to’o 2021, iha postu UPM ne’ebé estabelese iha postu Batugade, Atabae, Atauro, Beloi, portaun portu Dili, sionál Dili no postu Com Lospalos, laiha kondisaun tanba ekipamentu la sufisiente liuliu ró.

Nia fó exemplu iha postu Com-Lospalos, membru-sira loro-loron tuur iha postu tanba ró laiha atu halo operasaun.

“Governu la fó atensaun sériu, maka ita nian ikan sira iha tasi-laran ema mai foti hotu. Tanba esperénsia hatudu ita laiha buat ida atu kontrola tasi liuliu rikusoin sira iha tasi laran, liuliu peska illegál sira,” Peskizadór ne’e rekomenda.

Total membru UPM efetivu hamutuk nain 120, hodi fahe ba area tolu, mak hanesan serbisu iha  postu Batugade, Atabae, Atauro, Beloi, portaun portu Dili, sional Dili no postu Com Lospalos no iha kuartel UPM, ne’ebé serbisu ho  ró NRTL Lusitania, NRTL Dili, NRTL Hera, NV Timor-Leste, speed boat 12.

Notísia relevante: Ró avaria difikulta UPM asegura rikusoin tasi

Jornalista : Natalino Costa

Editór        : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here