Prezidente Repúblika, Francisco Guterres Lú Olo, fó pose ba adjunta Prokuradora Jerál Repúblika (PJR), Remízia de Fátima da Silva, iha salaun China Palásiu Prezidénsiál Nicolau Lobato, Bairru Pite, Dili, sesta (05/11). Imajen Tatoli/Francisco Sony.

DILI, 05 novembru 2021 (TATOLI)—Prezidente Repúblika, Francisco Guterres Lú Olo, sesta ne’e fó pose ba Remízia de Fátima da Silva sai Adjunta Prokuradór Jerál Repúblika (PJR) ba mandatu tinan tolu.

“Haree ba prosedimentu hatuur iha ita-nia konstituisaun mak ha’u hili majistrada Ministériu Públiku nian, Señora Dra. Remízia de Fátima da Silva, nu’udar Adjunta ba Prokuradór-Jerál Repúblika,” Prezidente Repúblika hateten iha nia diskursu iha Palásiu Prezidensiál Nicolau Lobato, Bairu Pite, Dili.

Konstituisaun Repúblika Demokrátika Timor-Leste fó kompeténsia ba Prezidente Repúblika atu nomea no ezonera adjuntu ba Prokuradór-Jerál Repúblika, hafoin rona Konsellu Superiór Ministériu Públiku liuhosi artigu 86 alínea 1 no artigu 133 númeru 6.


Adjunta Prokuradora Jerál Repúblika, Remízia de Fátima da Silva. Imajen Tatoli/Francisco Sony.

Norma konstitusionál sira-ne’e tama iha artigu 14 no 84 Estatutu Ministériu Públiku nian (Republikasaun Lei númeru 14/2005 hosi loron 16 Setembru, haktuir alterasaun dahuluk ba lei númeru 11/2011, 28 Setembru), ne’ebé hatuur rejime legál ba nomeasaun adjuntu sira ba Prokuradór Jerál Repúblika.

PR Lú Olo hateten, tanba haktuir norma sira hatuur iha konstituisaun no lei ordinária, hafoin  rona Konsellu Superiór Ministériu Públiku mak nia-parte foti desizaun hili majistradu ida hodi kaer kargu nu’udar Adjuntu Prokuradór-Jerál Repúblika ne’ebé mamuk hela, hafoin eis-Adjuntu Prokuradór-Jerál Repúblika, Alfonso Lopez, simu fali knaar nu’udar Prokuradór Jerál Repúblika.

Prezidente Repúblika iha kbiit atu hili Adjuntu ba Prokuradór-Jerál Repúblika hosi lista majistrada ka majistradu Ministériu Públiku ho kategoria primeira klase, tuir rekezitu legál sira-ne’ebé mak hatur ona no tuir mós artigu 14 hosi Estatutu Ministériu Públiku.

Prezidente hateten, Ministériu Públiku nia modelu organizasaun ho estrutura ierárkika ida-ne’ebé hatán ba Prokuradór-Jerál Repúblika, tuir artigu 133 konstituisaun repúblika haruka.

Tanba Ministériu Públiku organiza-an tuir ierarkia ida, Prokuradór Jerál Repúblika hatán ba Prezidente Repúblika no mós ba Parlamentu Nasionál.

Estatutu Ministériu Públiku, haktuir konstituisaun hatuur katak adjuntu Prokuradór-Jerál Repúblika mak iha kompeténsia atu koadjuva no substitui (hola fatin) Prokuradór Jerál Repúblika.

Adjuntu Prokuradór Jerál Repúblika de’it mak bele kaer knaar aas ne’e iha dirasaun Ministériu Públiku nian no mós  knaar sira seluk ne’ebé Prokuradór-Jerál Repúblika bele delega ba sira, tuir lei haruka.

“Hosi kompeténsia sira ne’ebé Prokuradór-Jerál bele delega ba ninia adjuntu sira, ha’u temi mak  reprezentasaun, liuhosi substituisaun, iha tribunál superiór sira iha instánsia aas liu katak Supremu Tribunál Justisa no Tribunál Superiór Administrativu, Fiskál no Kontas  no mós  bainhira hala’o knaar dirasaun nu’udar kompeténsia tama iha ierarkia Ministériu Públiku nian.

Nune’e, knaar Adjuntu ba Prokuradór-Jerál Repúblika iha importánsia no signifikadu boot tebes iha Ministériu Públiku ninia orgánika no lala’ok.

Xefe Estadu hateten, hetan referénsia di’ak tebes kona-ba dezempeñu Remízia de Fátima da Silva iha knaar públiku sira-ne’ebé nia hala’o to’o ohin loron ho responsabilidade oioin.

Hare’e ninia kapasidade no kualidade profisionál no pesoál, inklui ninia karáter, nune’e fiar katak sei hala’o ninia knaar nu’udar Adjunta Prokuradór-Jerál Repúblika ida-ne’ebé ezemplár, ho méritu aas.

“Majistrada ida-ne’e, ne’ebé foin simu pose, iha esperiénsia liu tinan 20 iha Ministériu Públiku. Esperiénsia naruk ida-ne’e hariku liután ho knaar ne’ebé nia hala’o ona, nu’udar Prokuradora Repúblika Distritál. Tanba iha ona esperiénsia uluk iha knaar dirasaun, supervizaun no koordenasaun, ne’e hakbiit an tiha ona ho atributu importante ba  ninia kargu  foun,” nia hateten.

Haree ba ninia esperiénsia iha tinan barak nia laran, hamutuk ho ninia kualifikasaun nu’udar Prokuradora Repúblika ho kategoria primeira klase, majistrada ida-ne’e bele hatán ba ezijénsia boot sira hosi kargu ida-ne’e.

Adjunta PJR hatene knaar konstitusionál sira-ne’e no oinsá hala’o tuir Estatutu Ministériu Públiku haruka, liuhosi ninia servisu espesializadu sira.

Hosi knaar konstitusionál refere ba instituisaun ida-ne’e, Prezidente Repúblika hakarak temi liuliu reprezentasaun estadu nian, hala’o asaun penál, defeza ba menór sira, ema ne’ebé la prezente no la iha kbiit, no mós kona-ba defende legalidade demokrátika no promove kumprimentu lei.

Knaar sira-ne’e hotu hosi Ministériu Públiku tenke hala’o iha ámbitu majistratura ida-ne’ebé ierarkizada, maibé tenke hala’o tuir lei no regulamentu sira-ne’ebé aplikável.

Prevensaun no kombate hasoru kriminalidade en-jerál no hasoru korrupsaun no kriminalidade organizada no transnasionál tenke halo beibeik, no ida-ne’e ezije aten-barani no motivasaun rohan-laek, la’ós de’it hosi ajente sira Ministériu Públiku nian, maibé mós hosi instituisaun sira seluk no sidadaun no sidadã sira-ne’ebé partisipa iha luta ida-ne’e.

Atu luta ne’e la’o ba oin ho di’ak no hetan susesu metin kedas, dirasaun Ministériu Públiku nian tenke  kompetente no efikás liután no ba beibeik, ida ne’e sei sai responsabilidade sentrál ida ne’ebé  Adjuntu PJR sei kaer liuhosi kolaborasaun ho ninia Prokuradór Jerál Repúblika.

“Ha’u fiar katak hatene momoos katak knaar sira-ne’ebé sei hala’o hosi ohin ba oin, nu’udar Adjunta Prokuradór-Jerál Repúblika, ezijente tebe-tebes no ita hotu hein sei efetivu no sai ezemplár,” nia dehan.

Nu’udar Xefe Estadu, Prezidente Repúblika atu fó apoiu institusionál nesesáriu hodi hametin no haburas Ministériu Públiku nu’udar instituisaun iha ámbitu Estadu direitu demokrátiku ninia sistema judisiária.

Justisa sai hanesan indikadór di’ak ida kona-ba saúde demokrasia nian iha ita-nia rain, nune’e, ba protagonista sira-ne’ebé halo parte área judisiál, hakarak hatete fali ninia kompromisu atu fó apoiu tuir ninia knaar konstitusionál.

Fatin hanesan Adjunta PJR, Remízia de Fátima da Silva, sente onra boot ida-ne’ebé Prezidente Repúblika fó konfiansa hodi asume kargu ne’e. Durante ne’e, Remízia de Fátima da Silva hanesan prokuradora distritál Baucau.

Nia agradese ba konfiasa no iha devér atu kumpre kargu ne’ebé simu ho servisu ne’ebé di’ak liu-liu lori instituisaun ba oin no fó justisa di’ak ba povu ne’ebé hein hela justisa.

“Kompeténsia propriu lei la define, nune’e hein Prokuradór Jerál delega mai ha’u kompeténsia saida mak bele halo kumpre ho lealdade atu bele servisu hamutuk,” nia dehan.

Serimónia ne’e partisipa hosi Prezidente Parlamentu Nasionál Aniceto Longuinhos Guterres Lopes, Ministru Justisa Manuel Cárceres da Costa, membru governu, korpu diplomátiku ho konvidadu sira seluk.

Jornalista : Nelson de Sousa

Editór        : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here