Ministru Ensinu Superiór Siénsia no Kultura, Longuinhos dos Santos. Imajen TATOLI/Francisco Sony

DILI, 05 novembru 2021 (TATOLI)—Komisaun G ne’ebé trata asuntu Edukasaun, Kultura, Juventude, Desportu no Sidadania, halo audiénsia públika ho Ministériu Ensinu Superiór, Siénsia no Kultura (MESSK) kona-ba alokasaun Orsamentu Estadu Jerál Estadu (OJE) 2022.

Orsamentu tinan oin ba MESSK hamutuk $5.186.739, kompostu hosi saláriu no vensimentu $1.805.901, bens no servisu $2.871.838, transferénsia públika $ 314.000 kapitál menór laiha, no kapitál dezenvolvimentu $195.000.

Ministru Ensinu Superiór Siénsia no Kultura, Longuinhos dos Santos, hateten, orsamentu ba ministériu prevee ba programa prioridade tolu iha tinan oin, kompostu hosi programa kultura no patrimóniu $1.215.876, boa governasaun no jestaun institusionál $2.158.828 no edukasaun no formasaun $1.812.035.

“Tinan 2022 ita iha programa prioridade tolu, sub programa sia no atividade 25,” Ministru Longuinhos dehan hafoin partisipa audiénsia públika, iha salaun Komisaun G, sesta ne’e.

Biban ne’e, Prezidente Komisaun G, Deputadu António Verdial de Sousa, apresia ho vontade ekipa ministériu ne’ebé fasilita ona produsaun livru orsamentál inklui programa sub programa no atividade sira ba tinan 2022.

“Se ministériu hotu prepara hanesan Ministériu Ensinu Superiór, Siénsia no Kultura, maka sei la prejudika komisaun ninia servisu, tanba komisaun haree saida mak ministériu aprezenta  hatudu katak sira prepara-an atu hasoru malu ho Komisaun G. Ha’u apresia preparasaun ministériu tanba sira bele prodús livru ho programa prioridade inklui sub programa no atividade sira, ida-ne’e maka ita konsidera líder ida hatene lidera, jere no garante progresu instituisaun ida,” nia akresenta.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here