Ministru Administrasaun Estatál (MAE), Miguel Pereira de Carvalho. Imajen/TATOLI

DILI, 05 novembru 2021 (TATOLI)—Ministériu Administrasaun Estatál (MAE), lideradu hosi Miguel Pereira de Carvalho, prevee $33,723,731 iha Orsamentu Jerál Estadu (OJE) 2022 hodi finansia ba programa tolu no subprograma lima ho atividade 21.

“Hosi totál orsamentu $33,723,731 ne’e, sei finansia ba programa tolu (3), sub-programa lima (5) no atividade 21. Programa prinsipál tolu mak dezsentralizasaun administrativa no poder lokál, boagovernasaun no jestaun institusionál, inklui igualdade jéneru no inkluzaun sosiál,Miguel Pereira de Carvalho, hateten ba jornalista sira hafoin halo audiénsia públika ho Komisaun A iha Parlamentu Nasionál (PN), Dili, sesta ne’e. 

Hosi totál orsamentu $33,723,731 ne’e, MAE sei aloka orsamentu barak liu iha tinan oin ba implementasaun programa nasionál dezenvolve suku hodi garante infraestrutura bázika iha suku sira, nune’e komunidade sira bele benefisia diretamente ba projetu sira-ne’e hotu.

“Ita sei tau mós orsamentu uuitoan ba programa uma ba povu sira-ne’ebé nia foku ba itania populasaun sira-ne’ebé kbiit la’ek. Alende ne’e, aloka mós ba programa momentu hafoun aldeia,” nia dehan.

Tuir dokumentu livru 2 planu anuál OJE 2022, MAE propoin $33,723,731 aloka ba saláriu vensimentu $3,670,598, bens servisu $7,447,288, kapitál menór $1,037,800, kapitál dezenvolvimentu $450,000 no transférensia públika $21,118,045.

Iha tinan 2022, MAE nia programa prioridade tolu mak dezsentralizasaun administrativa no poder lokál sei gasta $24,201,199, boa-governasaun no jestaun institusionál sei gasta $9,496,016 no igualdade jéneru no inklusaun sosiál sei gasta $26,516.

Nune’e mós programa dezsentralizasaun administrativa no poder lokál, ho nia objetivu médiu prazu (outcome) garante ba implementasaun efetiva hosi dezsentralizasaun administrativa no poder lokál.

Programa ne’e ho nia sub-programa dezenvolvimentu lokál, ho atividade supervisiona atividade ba dezenvolvimentu lokál, jestaun ba programa nasionál hosi dezenvolvimentu suku (PNDS), apoia ba administrasaun suku, inklui apoia no koordena planeamentu ba dezenvolvimentu integradu munisipál (PDIM).

Alende ne’e, iha mós sub-programa seluk mak dezsentralizasaun administrativa, ho nia atividade superviziona atividade sira hosi dezsentralizasaun administrativa no poder lokál, apoia no presta asiténsia téknika ba autoridade no administrasaun munisipál iha jestaun finansa no administrasaun patrimóniu munisípiu, instalasaun ba orgaun hosi dezsentralizasaun administrasaun no poder lokál, moderniza administrasaun lokál no kapasita rekursu umanu, promosaun ijiéne no organizasaun urbana, inklui koordena no apoia munisípiu sira no postu administrativu ho prosesu polítiku dezsentralizasaun.

Alende ne’e mós, iha programa boa-governasaun no jestaun institusionál, ho nia objetivu médiu prazu (outcome) konstrui konfiansa no Governu.

Ninia sub-programa boa-governasaun, ho nia atividade planeamentu, dezenvolvimentu estratéjiku no orientasaun polítika, inspesaun, fiskalizasaun no auditória, koordena no jere servisu korporativus no mós koordena asistênsia téknika espesializada ba órgaun no servisu sentrais hosi ministériu.

Alende ne’e mós, iha sub-programa seluk hanesan jestaun institusionál, ho nia atividade jestaun finanseira, administrasaun no Lojístika, planeamentu, monitorizasaun no estatístika, jestaun rekursu umanu, organizasaun no jestaun ba eventu, aprovisionamentu no jestaun ba kontratu no mós jestaun ba sistema informasaun no komunikasaun.

Enkuantu, programa igualdade jéneru no inkluzaun sosiál, ho objetivu médiu prazu (outcome) ba dezigualdade jeneru mak redús, ho ninia sub-programa mak implementasaun ba NAP-GBV, ho nia atividade koordenasaun no apoia ba kapasitasaun autoridade lokál no líder komunitáriu iha área igualdade jeneru no inklusaun sosiál.

Entretantu, Ministériu Administrasaun Estatál (MAE) aprezenta ba 2022 hanesan estimativa forsa servisu ne’ebé iha MAE hamutuk 984 (feto 353, mane 564) no funsionáriu ho kargu diresaun xefia hamutuk 86.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here