Jogadór Nataniel Reis, momentu Kapitaun ekipa Boavista FC Timor. Imajen/Espesiál

DILI, 05 novembru 2021 (TATOLI)– Lalenok United FC konkorda ona atu halo transferensia jogadór Nataniel Reis ba Karketu Dili FC atu kompete jogu iha époka 2021.

Iha sesta (05/11), Jerente ekipa futeból rua,kompostu hosi Sekretáriu Jerál Karketu Dili FC ho jerente Lalenok FC tuur hamutuk hodi konkorda malu atu halo transferensia  ho baze ba jogadór Nataniel Reis nia desizaun atu labele iha problema entre klube rua.

Hafoin enkontru, Sekretariu Jerál Karketu, Elizeu Isaac, hateten, Jogadór Nataniel Reis muda aan ba Karketu laiha konesimentu hosi Lalenok, maibé konkorda malu ona atu halo transferensia.

“Ita rezolve ona ho prosesu transferensia liu hosi hasoru malu entre klube rua no jogadór ne’e sai ona hosi Lalenok no agora sai jogadór Karketu nian. Ita halo ona transferensia ho osan tuir Lalenok fó ba Jogadór Nataniel,” Sekretáriu Jerál ne’e hateten ba Agência TATOLI iha kampu Federasaun Futeból Timor-Leste (FFTL), Dili, sesta ne’e.

Iha fatin ketak, Jogadór Nataniel Reis, informa, nia parte deside hamutuk ho Klubu Karketu Dili FC.

“Ohin klube rua tuur hamutuk hodi haree, maibé ha’u hili mak Karketu, ne’ebé ba oin ha’u joga iha Karketu. Durante hahú 2020 to’o agora hamutuk ho Lalenok, maibé agora ha’u hakarak iha fali Karketu,” Jogadór ne’e afirma.

Jogadór ne’e hanesan mós avansadu antigu Boavista FC Timor nian bainhira Boavista sei naran Carsae FC iha 2015 to’o 2019. Muda ba Karketu, jogador ne’e uza kamizola númeru 8 no sei joga iha pozisaun play maker.

Nataniel Reis hanesan mós jogadór selesaun nasionál ho pozisaun play maker. Bainhira tana ba selesaun nasionál Nataniel hahú uluk nia karreira hanesan jogadór sentru juveníl iha 2006 iha U-12, 2009 komesa hamutuk iha U-16 no 2013 nia muda on aba U-19.

Hosi espriénsia ne’ebé iha jogadór ne’e hetan fiar hosi Fredarsaun Futeból Timor-Leste (FFTL) liuhosi treinador Japan Tsukitate no Asistente Eduardo Pereira iha 2014 hanesan jagadór senior U-23 seleasaun nasionál.

Bainhira involve iha selesaun nasionál senior, Nataniel hamutuk ho kolega sira reprezenta Timor-Leste ba joga iha internasionál hanesan Sea Gamesa dala-tolu tuituir malu, ASEAN Games dala-rua no Suzuki Cup dala-rua.

Durasaun kontratu Nataniel Reis iha Karketu tinan ida no kontratu sei iha mudansa ka prolonga bainhira treinadór hare performe jogador nian iha kampu epoka ne’e.

Notísia Relevante: Nataniel muda ba Lalenok tanba Boavista mak hasai

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here