Diretór kompañia Luse Laque, Luís Ribeiro. Imajen TATOLI/Vitorino Lopes da Costa

VIQUEQUE, 05 novembru 2021 (TATOLI)–Kompañia lokál Luse Laque, ho inisiativa kuda salak hun 1.000-resin iha suku Caraubalu, postu Viqueque villa, munisípiu Viqueque, ho objetivu atu fa’an iha merkadu nasionál no munisípiu sira.

“Ha’u-nia to’os kuaze ektare tolu, maibé ha’u foin kuda salak ba rai medida ektare ida, salak ne’ebé kuda ona ne’e 1.000-resin. Planu kuda produtu salak ne’e atu fa’an iha Dili, Baucau no Viqueque,” Diretór kompañia Luse Laque, Luís Ribeiro, hateten, ba Agência TATOLI, iha ninia rezidénsia Olobai, suku Caraubalu, sesta ne’e.

Nune’e, iha loron 30 outubru ne’e, Ministru Koordenadór Asuntu Ekonómiku (MKAE), Joaquim Amaral, akompaña hosi Diretór Ezekutivo IADE, Filomeno Marcelino Belo, Autoridade munisípiu no Autoridade seguransa, harii plaka investimentu plantasaun salak iha suku Caraubalu, nune’e iha futuru bele sai kompañia ne’e bele sai benefisiáriu programa fasilidade inkubasaun negósiu hosi Institutu Apoiu Dezenvolvimentu Emprezariál (IADE).

Diretór kompañia hakuir, nia hahú kuda salak iha tinan 1993 desde tempu okupasaun Indonézia.

“Antes ne’e, ema haruka ami ba tuir formasaun kona-ba kuda ai-horis iha Sulawesi Tengara. Iha ne’ebá aprende kuda kaizus, sabaraka, has, nuu no ai-horis seluk inklui salak rasik, ne’ebé iha momentu ne’ebá ai-horis sira seluk ne’e Timór iha ona, maibé salak seidauk iha,” Luís konta tuir.

Nune’e, bainhira Luís ho nia kolega sira fila mai Timór iha dezembru 1994, sira sosa salak kilógrama tolu.

“To’o Timór ha’u han balun no balun kuda. Ha’u-nia to’os nafatin kuda salak. Momentu ne’ebá salak hun hamutuk sanulu resin maka moris durante tinan-tolu, iha tinan 1997 salak komesa funan ona no fuan. Entaun, hosi ida-ne’e, ha’u komesa kuda to’o agora,” nia akresenta.

Nune’e, kada tinan Luís ho ninia ekipa ho inisiativa rasik sempre kuda halo nakonu to’os ektare rua ne’ebé sei mamuk.

“Maibé prosesu kuda susar tebes, tanba ne’e to’o agora seidauk nakonu iha to’os. Agora komesa funan, tama janeiru mak hahú tasak ona. Ami fa’an salak kada kilógrama folin $5.Hahú hosi inísiu kuda salak ne’e ha’u mesak de’it, la serbisu hamutuk ho ema seluk. Rendimentu salak nian durante ne’e uza ba nesesidade uma-laran inklui halo uma,” nia hato’o.

Maski nune’e, durante ne’e kompañia lokál ne’e seidauk hetan apoiu ruma hosi parte organizasaun naun governamentál sira inklui Governu.

“Ha’u seidauk hetan apoiu ruma kona-ba negósiu salak. Foin lalais maka Governu liuhosi MKAE tau plaka iha plantasaun salak atu apoiu,” Luís dehan.

Antes ne’e, kompañia hamutuk 19 sai benefisiáriu ba programa fasilidade inkubasaun negósiu hosi IADE hodi finansia atividade negósiu, maibé la inklui kompañia lokál Luse Laque.

Notísia relevante: IADE apoiu $113.000 ba empreza selesionadu 19 programa inkubasaun negósiu

Dezafiu ne’ebé hasoru durante hala’o atividade maka halo lutu, ne’ebé kada tinan tenke hasai osan $75.

“Bainhira laiha lutu, animál bele han hotu salak. Tanba ne’e, tenki iha lutu hodi proteje salak. Presiza haboot salak tanba dala barak ema hanoin aifuan ne’e iha rai-li’ur de’it, maibé iha ita-nia rain mós salak iha. Tanba ne’e, ita presiza kuda aifuan ne’e hodi fa’an iha merkadu inklui iha munisípiu sira,” nia subliña.

Jornalista : Vitorino Lopes da Costa

Editora     : Julia Chatarina

PUBLISIDADEiklan

1 KOMENTÁRIU

HAKEREK NO HATÁN

Please enter your comment!
Please enter your name here