Ekipa SEII no entidade relevante kari aifunan iha ossuáriu hodi komemora Loron Nasionál Feto. Imajen/SEII

DILI, 05 novembru 2021 (TATOLI)–Sekretária Estadu Igualdade no Inkluzaun (SEII), Maria José da Fonseca Monteiro de Jesus, hateten, komemorasaun Loron Nasionál Feto Timor-Leste ba dala-45 importante hodi valoriza feto eroina sira ne’ebé luta ba Timor-Leste ninia indepedénsia.

“Komemorasaun ne’e ita rekoñese kontribuisaun ne’ebé ita-nia eroina Saudoza Maria Tapo no eroina sira seluk iha prosesu luta ba ukun-rasik an. Ita aproveita oportunidade ida-ne’e hodi rekoñese kontribuisaun feto Timor-Leste, ne’ebé sei prontu kontinua kontribui iha tinan hirak ba oin iha prosesu no setór oioin atu asegura katak timor-oan hotu bele moris no goza sira-nia direitu hanesan iha independénsia,” Sekretária Estadu Maria José dehan liuhosi nota ne’ebé Agência TATOLI asesu, sesta ne’e.

Notísia relevante: PM Taur kongratula feto Timor-Leste

Governante ne’e hato’o lia hirak ne’e, bainhira komemora loron nasionál ne’e iha Luak-Parke Dom Boaventura, suku Daisua, postu Same villa, munisípiu Manufahi, ne’ebé akompaña mós hosi Prezidente Konsellu Veteranu Kombatente Libertasaun Nasionál, Vidal de Jesus ‘Riak Leman’ no Administradór munisípiu Manufahi, Arantes Isaac Sarmento, hamutuk ho reprezentante liña ministeriál, Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) inklui komunidade lokál.

Loron Nasionál Feto ne’ebé monu iha loron 03 novembru, hanesan rekoñesimentu ne’ebé Estadu fó hodi valoriza Saudoza Maria Tapo nia mate iha loron ne’e, hamutuk ho feto maluk seluk ne’ebé mate, hodi hatudu ba Timor-Leste katak feto fó nia kontribuisaun, feto hamriik hanesan parseira maluk mane sira iha prosesu luta ba ukun rasik-an no feto kontinua hamriik to’o ohin loron atu kontribui iha prosesu dezenvolvimentu rai ida-ne’e.

Iha biban hanesan, Administradór munisípiu Manufahi, Arantes Isaac Sarmento, konsidera  komemorasaun Loron Nasionál Feto hanesan momentu di’ak ida atu halo reflesaun hodi valoriza maluk feto Timor-Leste nia kontribuisaun hodi liberta pátria no liberta povu.

Nia mós nota katak envolvimentu feto iha prosesu dezenvolvimentu rai ida-ne’e importante tebes, tanba la’ós de’it kontribui ba dezenvolvimentu maibé sai ona autora prinsipál ida ba prosesu dezenvolvimentu hotu.

Nune’e mós, tuir Veterna Fernanda Tilman Cepeda ‘Lubi’, eroina sira-nia luta hodi husik liberdade ba foin-sa’e sira atu kontinua dudu dezenvolvimentu no hetan direitu ne’ebé rekoñesidu.

“Dezenvolvimentu ida-ne’e ita mak tenke tau devér hamutuk ho mane sira atu asegura katak tenke iha edukasaun, ekonomia, no saúde ne’ebé di’ak ba ema hotu,” nia tenik.

Iha komemorasaun loron Nasionál Feto, atividade ne’ebé SEII ho ekipa halo mak  misa ba matebian sira, kari ai-funan iha ossuáriu, diálogu ho komunidade, kompetisaun dada-tali entre maluk feto hosi postu administrativu Turiskai, Fatuberlihu, Alas no Same-villa no fahe mós prémiu ba manán-na’in dada-tali no halai taru Bisikleta.

Atividade seluk ne’ebé ekipa hosi SEII halo iha ámbitu komemorasaun Loron Nasionál Feto maka halo vizita ba veterana Luisa de Jesus, ne’ebé oras ne’e daudaun ho kondisaun moras iha suku Letefoho, inan-faluk vulnerável, Lourença da Costa iha suku Daisua no hala’o mós vizita ba maluk feto defisiénsia matan, Marçiana Marçal iha aldeia Fahiluhan, suku Holarua.

Objetivu hosi vizita hirak-ne’e atu haree direta kondisaun no dada-lia ho inan veterana no família vulnerável ne’e hodi hatene difikuldade sira.

Iha vizita ne’e Sekretária Estadu hetan akompañamentu hosi Administradór Munisípiu Manufahi ho nia espoza, Asosiasaun Feto potensiál munisípiu Manufahi, Diretora Sentru Solidariedade Sosiál munisípiu Manufahi no Prezidente AFMADDEMA.

Aleinde ne’e, fahe mós nesesidade bázika balun ba inan veterana ho família vulnerável hirak-ne’e atubele hakma’an sira iha loron balun.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here