Klube Sose Mucu, sai kampiaun jogu amizade Oe-leu Cup époka 2021. Imjen Tatoli/Sérgio da Cruz.

BOBONARO, 04 novembru 2021 (TATOLI) — Klubu Sose Mucu sai kampiaun iha jogu amizade Oe-leu Cup, iha postu administrativu Bobonaro, munisípiu Bobonaro tinan 2021 nian hafoin halakon ekipa Blokir FC liuhosi rezultadu sutu penalidade 8:7.

Ho rezultadu ne’e, vitória ba Klubu Sose Mucu hosi Suku Tapo, gaña títulu kampiaun jogu amizade Oe-leu Cup époka 2021, Blokir FC sai segundu lugár no terseiru lugár okupa hosi Loysagal FC.

Jogu ne’e primeiru lugár hetan prémiu hanesan taxa rotativa ho osan montante $100, segundu lugár hetan taxa ho osan $75 no terseiru lugár hetan $50, enkuantu mellór markador hetan $10 no mellór jogadór hetan taxa.

Biban ne’e, treinadór Sose Mucu FC, Januário Amaral Martins, sente kontente tanba nia ekipa konsege susesu sai kampiaun iha jogu amizade Oe-leu Cup tinan 2021 nian.

“Susesu ida-ne’e liuhosi ami-nia esforsu maka’as, maske hasoru difikuldade barak, maibé jogadór sira iha vontade halakon klubu barak,  to’o ikus ami sai kampiaun, ne’ebé ami la’ós para iha-ne’e de’it, tinan oin ami otimista nafatin sai kampiaun,” nia ko’alia iha kampu Futeból Oe-leu, kinta ne’e.

Prezidente Komisaun Organizadora, Alvaro do Rego, informa jogu amizade ne’e realiza atu komemora akontesimentu masakre 12 novembru 1991, hodi dignifika no valoriza eroi sira-ne’ebé sakrifika sira nia-aan luta ba autodeterminasaun independénsia Timor-Leste nian.

Kada tinan intelektuál suku Oe-leu ne’ebé hamahan-aan iha Organizasaun Klibur Estudante Juventude Oe-leu (KEJO) ,sempre realiza jogu ne’e ho objetivu enkoraja joven sira atu banati tuir amizade ne’ebé eroi sira halo, nune’e kria pás no establidade iha suku laran.

“Ha’u enkoraja joventude sira-ne’ebé mai kompete iha eventu ne’e, atu nafatin prepara imi-nia mentalidade, fíziku no tátika ba tinan oin,” nia rekomenda.

Fundu ba realizasaun eventu ne’e mai hosi kontrubuisaun komunidade no juventude suku Oe-leu, kada ema ida kontribui hosi $1 to’o 10 dolar.

Enkuantu klubu ne’ebé kompete iha eventu mai hosi suku 18 iha postu administrativu Bobonaro hamutuk 13 inklui klubu ida hosi suku Holsa, postu administrativu Maliana.

Notísia relevante: KEJO realiza jogu amizade komemora masakre 12 Novembru

Jornalista         : Sérgio da Cruz

Editor               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here