Kandidatu Brigada STAE partisipa teste eskrita, iha salaun Administrasaun Viqueque, sesta (05/11). Imajen TATOLI/Vitorino Lopes da Costa

VIQUEQUE, 05 novembru 2021 (TATOLI)—Kandidatu Brigada Sekretariadu Tékniku Administrasaun Eleitorál (STAE) Viqueque no nasionál hamutuk 248 partisipa teste estrita iha salaun administrasaun Viqueque, nu’udar preparasaun rekursu ba eleisaun prezidensiál iha marsu 2022.

“Ohin ami fó teste ba kandidatu brigadista hamutuk na’in-248, ne’ebé bazeia ba vaga ne’ebé fó sai presiza brigada hamutuk na’in-92. Tanba ne’e, hakarak ka lakoi balun tenki hela, maibé ida ne’ebé la liu, labele laran taridu,” Reprezenta Diretór Jerál STAE nasionál, Henrique Soares, hateten ba Agência TATOLI, iha salaun Administrasaun Viqueque, sesta ne’e.

Tuir Henrique, atu liu ka lae, kandidatu hotu mesak timor-oan hotu, ne’ebé tenki hatudu vontade serbisu ho responsável.

“Bainhira teste ba brigada maka ita boot la liu, iha janeiru STAE sei loke tan oportunidade ba kandidatu balun, teste ne’e sai hanesan kompetisaun ba kandidatu sira, tanba eis brigadista no eis staff tuir hotu, depende ba ida-idak ninia koñesimentu no abilidade,” nia akresenta.

Iha biban ne’e, Komandante Polísia Nasionál Timor-Leste (PNTL) munisípiu Viqueque, Superentendente Polísia, Sebastião Alves Quintão, hateten, parte seguransa sente kontente tanba haree kandidatu brigadista sira mai partisipa teste, nune’e garante estabilidade iha rejiaun ne’e.

“Prezensa ita-boot sira atu akompaña eleisaun prezidensiál ne’ebé besik ona. Iha teste ne’e hanesan kompetisaun ne’ebé lakon no manan, ita boot sira tenki hatudu abilidade no ami nafatin garante estabilidade,” nia tenik.

Iha biban hanesan, Diretór Servisu Komisaun Nasionál Eleisaun (CNE-sigla portugés) munisípiu Viqueque, Honorio Cruz da Silva, ne’ebé loke atividade ne’e, husu ba kandidatu brigadista sira ne’ebé tuir teste, tenki hatudu onestidade no prienxe matéria tuir koñesimentu ne’ebé iha.

“Atu lakon ka manan la’ós kestaun, importante maka iha koñesimentu hodi ezerse funsaun iha tempu eleisaun nian,” nia dehan.

Enkuantu, kritéria ba teste, obrigatóriu tenki lori kartaun eleitorál no kartaun vasina.

Ekipa juri ba teste eskrita kompostu hosi STAE nasionál, munisípiu Viquequ no CNE, ne’ebé bainhira kandidatu liu teste eskrita, maka sei tuir tan faze entrevista iha loron 17 novembru 2021.

Kandidatu 300 konkorre vaga Brigada STAE hamutuk 92

Diretór STAE munisípiu Viqueque, Humberto Fernandes, hateten, antes ne’e kandidatu brigada ne’ebé konkorre dokumentu hamutuk 300-resin, maibé barak maka lakon iha selesaun dokumentu, tanba ne’e kandidatu 248 mak kontinua ba teste eskrita.

“Konkursu ba brigada ne’e loke ba postu lima iha Viqueque, nune’e fulan kotuk ami taka avizu, hafoin kandidatu hosi postu hatama dokumentu iha kada postu maka foin haruka mai munisípiu no munisípiu haruka ba STAE nasionál hodi halo selesaun. Atu sai brigada ba sentru votasaun, kritéria maka kandidatu sira tenki iha koñesimentu kona-ba eleisaun. Ba kanditu ne’ebé atu tuir ezame eskrita, ami informa hotu ba sira katak sei ezame eskrita, ne’ebé kandidatu ne’ebé la tuir, signifika lakon,” nia esplika.

Bazeia ba sentru votasaun iha munisípiu Viqueque, daudaun kandidatu iha 248, maibé presiza de’it brigadista na’in-92 hodi destaka ba eleisaun prezidensiál.

“Matéria ba kanditu brigada sira maka sei husu kona-ba eletoirál no matéria ba eleisaun nian. Hosi matéria sira maka ita bele hatene koñesimentu brigada sira-nia, nune’e ita bele uza iha eleisaun,” nia tenik.

Matéria ba brigada prepara hosi STAE nasionál, liuhosi Diresaun Rekursu Umanu no teste eskrita hahú tuku 08:00 to’o ramata.

Jornalista : Vitorino Lopes da Costa

Editora    : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here