Xefe Kontrolu Kualidade HorEX, Claudino Ximenes. Imajen TATOLI/Natalino Belo.

BAUCAU, 05 novembru 2021 (TATOLI) – Hospital Referál Eduardo Ximenes (HorEX) rejista pasiente hamutuk 143 mak halo tratamentu durante selebrasaun loron finandu.

Xefe Kontrolu Kualidade HorEX, Claudino Ximenes, esplika, hosi kazu refere, pasiente na’in-lima mak tratamentu tanba hetan asidente tráfegu no na’in-lima mak kanek tanba rezulta hosi violénsia ka baku-malu.

Kazu hirak-ne’e hahú rejista hosi loron 30 outubru to’o 05 novembru tanba asidente tráfegu akontese antes no hafoin selebrasaun finadu  bainhira komunidade sira viajen entre Baucau no Dili.

“Asidente tráfegu maioria hosi motorizada hamutuk ema na’in-lima mak hetan kanek kmaan, iha na’in-ida mak kanek todan nune’e tenke transfere ba Hospital Nasionál Guido Valadares (HNGV,),” Claudino Ximenes, ko’alia iha Baucau, sesta ne’e.

Enkuantu kazu violénsia krime ne’ebé akontese durante finadu iha munisípiu Baucau hamutuk ema na’in-neen mak halo tratamentu iha HorEX.

“Balun hetan tuda, balun tá, baku, no ida mak tiru iha parte ain, tanba kartu iha ain entaun labele atende iha ne’e tenke transfere ba HNGV,” Claudino akresenta.

Hosi nain-neen akontese iha loron ne’ebé la hanesan, balun iha loron 30 novembru, enkuantu ida tiru ain akontese iha suku Samalari, postu administrativu Baucau vila iha loron 1 novembru.

Entertantu restante hosi kazu rua refere, pasiente balun halo tratamentu tanba moras bainbain hanesan Infesaun Respiratóriu Aguda (IRA), diária, tensaun sa’e no seluk tán.

Jornalista : Natalino Belo

Editór: Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here