Primeiru-Ministru, Taur Matan Ruak, prezide reuniaun Konsellu Ministru. Iha Palásiu Governu, sesta (05/11). Imajen TATOLI/Francisco Sony

DILI 05 novembru 2021 (TATOLI)—Governu liuhosi reuniaun Konsellu Ministru (KM), iha sesta ne’e, aprova ho alterasaun Projetu Proposta Lei Presidénsia no Protokolu Estadu, ne’ebé aprezenta hosi Ministra Negósiu Estranjeiru no Kooperasaun, Adaljiza Albertina Xavier Reis Magno.

Tuir Ministru Prezidente Konsellu Ministru, Fidelis Manuel Leite Magalhães, alterasaun lejizlasaun ne’e presiza ajustamentu balun ho lista anexu lei maibé ohin finaliza ona, ne’ebé sei haruka ba Parlamentu Nasionál.

“Konsellu Ministru aprova Projetu Proposta Lei ho objetivu atu define rejime jurídiku kona-ba organizasaun seremónia ofisiál sira, ne’ebé regula relasionamentu protokolár hosi entidade públika a’as sira iha seremónia Estadu no disiplina funsionamentu protokolu Estadu nian,” Ministru hateten iha Palásiu Governu.

Biban ne’e, ezekutivu sira aprova deliberasaun ida hosi MNEK hodi autoriza Ministra Negósiu Estranjeiru no Kooperasaun hodi prátika tuir lei, atu nesesáriu ba elaborasaun akordu asisténsia entre Governu Repúblika Demokrátika no Governu Repúblika Koreia.

“Ida-ne’e hanesan akordu sei orienta no hatuur kooperasaun hotu ne’ebé Timor-Leste iha ho Repúblika Koreia, nune’e aban bainrua bainhira inisiativa mosu iha futuru, pelumenus iha referénsia tanba akordu ne’e ho objetivu atu estabelese baze legál ida ba parseria ida-ne’ebé hakarak diversifika no bele dura ba tempu naruk, ne’ebé permite iha futuru, iha akordu kona-ba programa no projetu espesífiku sira iha ámbitu konsesaun ajuda sira ba setór oioin hosi atividade sira Timor-Leste,” Portavóz Governu dehan.

Akordu ne’e sei fasilita kooperasaun hosi entidade nasionál sira ho Ajénsia Kooperasaun Internasionál Koreia, ne’ebé parte MNEK sei asina akordu ho Governu Koreia hotu no sei lei lori fali mai KM, hafoin haruka ba Parlamentu Nasionál hodi bele ratifika.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here