Ekipa hatuur fatur dahuluk Igreja Protestante Timor-Leste (IPTL) Kongregasaun Bethesda Naedala iha Uatulari, sesta (29/10). Imajen/GASC

DILI, 05 novembru 2021 (TATOLI)–Gabinete Primeiru-Ministru (GPM) liuhosi Gabinete Apoiu Sosiedade Sivil (GASC, sigla portugés) apoiu fundu subvensaun públika hosi orsamentu 2021 hodi hatuur fatuk dahuluk konstrusaun igreja protestante rua.

Igreja ne’ebé hetan apoiu maka Igreja Protestante Timor-Leste (IPTL) Kongregasaun Bethesda Naedala, ne’ebé lokaliza iha postu administrativu Uatulari, munisípiu Viqueque, hetan aprovasaun orsamentu halo konstrusaun hamutuk $167.786.36, maibé foin halo transferénsia faze dahuluk 40% ho montante $67.114,54 no hatuur fatuk dahuluk iha loron 29 outubru 2021.

Pastór akompaña hatuur fatur dahuluk Igreja Evangelica Asembleia De Deus (IEAD) Congregação Belém Nazaré iha postu Ataúro, sábadu (23/10). Imajen/GASC

Seluk maka Igreja Evangelica Asembleia De Deus (IEAD) Congregação Belém Nazaré iha postu administrativu Ataúro, munisípiu Dili, hetan aprovasaun orsamentu hamutuk $637.927,66, maibé transferénsia faze dahuluk 40% ho montante $255.171,06 no hatuur fatuk dahuluk iha loron 23 outubru 2021.

Tuir Koordenadór GASC, Filipe da Costa, antes ne’e parte gabinete selebra ona akordu ho parte rua hodi halo konstrusaun igreja foun, inklui ligasaun eletrisidade, halo moru no servisu seluk tan.

“Ita fó apoiu fundu tanba kondisaun Igreja Kongregasaun Bethesda Naedala ladún seguru atu sarani sira uza hasa’e orasaun ba Maromak, ne’e duni sira merese asesu fundu hodi konstrui fali igreja no ohin ha’u mai hodi hatuur fatuk dahuluk hodi hahú hala’o konstrusaun,” koordenadór GASC, hateten liuhosi komunikadu imprensa ne’ebé Agência TATOLI asesu, sesta ne’e.

Nune’e, Governu fó apoiu fundu atu dignifika relijiaun seluk ne’ebé eziste iha Timor-Leste ne’ebé igreja foun sei konstrui ho kualidade di’ak hodi sarani sira uza ba atividade kultu no fó  ambiente seguru ba sarani sira.

Biban ne’e, Koordenadór GASC enkoraja sarani no entidade hotu atu serbisu hamutuk no fó apoiu másimu ba kompañia hodi garante obra ne’e nia kualidade iha futuru no ramata tuir akordu.

Iha biban hanesan, Reprezentante IPTL Kongregasaun Bethesda iha Naedala, iha suku Afaloicai, Pastór Manuel Pinto Amaral, hateten, igreja ne’e harii dezde tinan 1982, ne’ebé konstrui no renova ho materiál lokál iha tinan 1985, maibé hetan estragu iha tinan 1997 no iha tinan 2007 hetan estragu tan bainhira mosu konflitu, maibé agora ho Governu nia apoiu bele harii hikas.

“Ha’u ho naran sarani hamutuk 279 agradese ba Governu liuhosi Gabinete Apoiu Sosiedade Sivil, ne’ebé hatuur ona fatuk dahuluk ba konstrusaun foun Igreja Bethesda ho fonte orsamentu totál hosi Governu,” nia tenik.

Bazeia ba dezeñu no Bill of Quantity (BoQ) hosi ekipa téknika GPM, medida igreja hamutuk 90mx180m, inklui tanke bee-moos no parede hale’u.

Obra ne’e toma konta hosi kompañia Behoris Unipesoal, Lda mak sei konstrui ho durasaun fulan-sia.

Iha ámbitu hatuur fatuk dahuluk ba konstrusaun foun igreja protestante iha Viqueque partisipa hosi Deputadu balun, Autoridade lokál postu Uatulari, Autoridade Viqueque no Ataúro, inklui sarani sira.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here