Feto Bobonaro selebra loron nasionál Feto Timor-Leste ba dala-45 iha salaun autoridade munisipál Bobonaro. Imajen Tatoli/Sérgio da Cruz.

BOBONARO, 05 novembru 2021 (TATOLI)— Autoridade munisipál Bobonaro, sesta ne’e komemora loron nasionál Feto Timor-Leste liuhosi semináriu ida hodi enkoraja feto timór-oan sira partisipa ativa iha polítika no dezenvolvimentu nasionál.

Sekretáriu Autoridade Munisípiu Bobonaro, Júlio Carvalho Caero, ko’alia asuntu ne’e iha ámbitu komemorasaun loron nasionál Feto Timor-Leste ba dala-45 ho tema “Feto lideransa hodi haforsa demokrasia no kontribui ba dezenvolvimentu inkluziva”. Loron nasionál Feto Timor-Leste ne’e monu iha oron 03 novembru liubá.

Atividade semináriu ne’e mós fó onra ba eroína Maria Tapo nu’udar ema Bobonaro-oan ne’ebé ho vontade espíritu, maske feto iha área remota maibé oferese nia-an tomak luta ba libertasaun nasionál.

“Ita realiza semináriu ida-ne’e atu motiva feto la’o-tuir luta ne’ebé eroína sira husik hela nune’e bele partisipa ativa iha vida polítika no prosesu dezenvolvimentu nasionál,” Sekretáriu Autoridade Munisípiu Bobonaro, Júlio Carvalho Caero, ko’alia iha salaun administrasaun munisipál Bobonaro, sesta ne’e.

Autoridade Bobonaro tau ona prioridade ba estrada hosi diresaun Tunubibi ba iha Ponte Soso konsidera ho nu’udar ‘Avenida Maria Tapo’ no harii ona uma Mahon ‘Maria Tapo’ iha suku Raifun no Ritabou nian. Avenida ne’e ho objetivu dignifika no valoriza kontribuisaun eroína Maria Tapo iha prosesu dezenvolvimentu nasionál.

“Ami mós husu ona família, atu hatete sai ita-nia eroína ne’e mate iha-ne’ebé, maibé ohin ha’u ba ossuáriu husu katak urna ita-nia eroína Maria Tapo iha hela família. Ida-ne’e la buat ida, importante no interesante tebes mak ninia dedikasaun, valór no kontribuisaun ba rai ida ema hotu hatene no sura nafatin,” nia esplika.

Veterana Josefa da Costa kodigu ‘Soi Mali’, enkoraja feto timór-oan atu kontinua kaer-metin prinsípiu eroína Maria Tapo, ne’ebé apoia nia kaben ho aten-barani kaer-kilat funu hasoru inimigu sira iha situasaun defisil to’o hakotu nia iis ho bala-musan iha batalla.

“Uluk, ami halo funu, la’o iha mota-laran, fatuk kuak, ai-kuak, la’o-ain de’it iha situasaun defísil mos ami konsege manán funu naruk ida ne’e,” veterana ne’e hateten.

Prezidente Asosiasaun Feto Dezenvolvimentu Munisípiu Bobonaro, Domingas dos Santos, kongratula feto Bobonaero ne’ebé durante ne’e partisipa ativu iha vida polítika, relijioza no negósiu.

“Ita ukun-an ona, feto labele hatene de’it tama dapur, labele hein beibeik sasán no bikan, feto tenke barani hatudu imi-aan envolve-aan iha grupu koperativa no atividade sira seluk,” nia enkoraja feto timór-oan sira.

Molok realiza semináriu ne’e hala’o uluk misa agradesimentu iha Igreja Parókia Maliana, kontinua kari ai-funan iha Ossoário Odomau, no ikus realiza seminariu hosi oradór na’in-tolu ne’ebé ko’alia kona-ba partisipasaun feto iha vida seguransa, envolvimentu eroína Maria Tapo no partisipasaun feto iha dezenvolvimentu nasionál.

Jornalista         : Sérgio da Cruz

Editór               :Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here