Kogresista sira hosi klubu 14 fó votu unanimidade ba Aleixo Cobra re-eleitu ba Prezidente Asosiasaun Futeból Dili Leste (AFDL) ba períodu 2021 to’o 2025. Imajen/ Hortencio Sanchez

DILI, 05 novembru 2021 (TATOLI)– Aleixo Cobra, hetan konfiasa hosi kogresista sira ho votu unanimidade  hodi re-eleitu ba Prezidente Asosiasaun Futeból Dili Leste (AFDL), ba períodu 2021 to’o 2025.

Kogresu daruak ne’e hala’o iha Luz Clarita Dili, iha sesta (05/11), ne’ebé partisipa hosi klubu 14, kompostu hosi Calvario FC, Leste United FC, Maranatha FC, Maroni FC, SENOFA FC, EBC Farol, Vila Atauro FC, Arbitrajen, LCR FC, Dili Leste FC, Coração FC, Santa Cruz FC, Maria Auxiliadora FC no Porto Taibessi FC.

“Ha’u nia mandatu ba tinan haat mai ne’e, tau prioridade liuba infrastrutura hanesan hadia kampu futeból ba klubu sira bele utiliza,” Prezidente AFDL, Aleixo Cobra, hateten ba jornalista-sira hafoin ramata kongresu daruak.

Nia rekoñese, durante asume kargu labele hala’o atividade barak tanba laiha kampu futeból iha Dili.

“Mandatu foun ne’e,ha’u sei esforsu oinsá atu hadi’a  kampu Becora, Bidau no seluk tan liuhosi kooperasaun ho Governu Timor-Leste,” nia kompromete.

Iha biban hanesan, Prezidente klube SENOFA FC, Leo Araújo, espera ho prezidente re-eleitu bele lori susesu ba atividade AFDL nian iha futuru.

“Ami fiar Prezidente Aleixo Cobra bele hala’o serbisu ne’ebé di’ak hodi lori futeból iha Dili Leste nian ba oin,” Leo espera.

Kongresu daruak ne’e partisipa direta hosi Sekretáriu Jerál Federasaun Futeból Timor-Leste (FFTL), Nelio Isaac Sarmento, reprezentante Liga Futeból Timor -Leste (LFTL) José Carvalho no kongresista sira.

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here