Suspeitu FCS ne'ebé tiru joven na’in-rua iha Samalari sa’e kareta hafoin TDB aplia prizaun preventiva, sesta (05/11). Imajen TATOLI/Natalino Belo.

BAUCAU, 05 novembru 2021 (TATOLI) – Tribunál Distritál Baucau (TDB), sesta ne’e liuhosi prosesu interrogatóriu dahluuk aplika ona medida koasaun prizaun preventiva ba arguidu insiál FCS ne’ebé deskonfia tiru joven na’in-rua iha suku Samalari, postu administrativu Baucau vila, munisípiu Baucau.

Kazu refere akontese iha loron segunda (01/11) maizumenus oras 09:00 kalan, iha suku Samalari ne’ebé rezulta joven na’in-rua hetan tiru, na’in-ida mate fatin inisiál MC idade 21 no na’in-ida kanek todan inisiál DSMF. Kazu ne’e deskonfia tiru hosi ajente polísia (Ofisiál Pólisia Suku (OPS) ho inisiál FCS.

Ministériu Públiku (MP) akuza arguidu FCS komete krime omisídiu simples iha artigu 138 ne’ebé prevista iha Kódigu Penál (CP, sigla portugés) ho ameasa prizaun tinan ualu (8) to’o 20.

“Medida koasaun ne’ebé Tribunál akuza ba suspeitu FCS mak prizaun preventiva,” Defensór Públiku, José de Lima, ko’alia iha TDB, vila nova, sesta ne’e.

Suspeitu FCS halo atuasaun liuhosi tiru atensaun dala-tolu maibé kontinua konfrontu nune’e ba dala-haat mak konsenge rezulta na’in-ida kanek no ba dala-dalima mak rezulta vítima ida mate.

Defensór ne’ebé fó asisténsia legál ba arguidu sei halo rekursu tanba suspeitu hala’o hela orden serbisu iha terrenu relasiona ho selebrasaun loron finandu, suspeitu mós defeza ba aan tanba grupu rua hahú atake no ameasa suspeitu nia vida.

Nune’e, defeza rasik sei iha prazu loron 15 atu halo rekursu, tanba la dívia aplika pena omísidiu simples tanba halo auto-defeza.

“Parte defeza haree tuir loloos artigu ne’ebé aplika ba nia (arguidu) artigu 140 (omisídiu neglijente),” José akresenta.

Interrogatóriu dahuluk ne’e prezide hosi Juiza Florençia Freitas, Ministériu Públiku reprezenta hosi Prokuradór Bartolomeu Araújo no arguidu  FCS hetan asisténsia legál hosi Defensór Públiku, José Delima.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here