Karreta estadu ho xapa-matríkula 05.099. Foto ne’e hasai hosi Xefe Suku Lour, Miguel Lopez Gomes.

BOBONARO, 04 novembru 2021 (TATOLI) – Xefe Suku Lour, Miguel Lopez Gomes, husu ekipa fiskalizasaun konjunta ba viatura estadu, atu halo investigasaun ba ajente estadu ne’ebé utiliza karreta estadu ho xapa-matríkula 05.099 G, maibé PNTL Munisípiu Bobonaro la deteta durante selebrasaun loron finadu.

Xefe Suku Lour, Postu Administrativu Bobonaro, Munisípiu Bobonaro, Miguel Lopez Gomes, deteta karreta estadu ho xapa-matríkula 05.099 mai hosi área suku Molop nian ne’ebé tula família nakonu ho objetivu atu halo viajen ba kapitál Dili.

“Ha’u la hatene karreta ne’e hosi ministériu ida-ne’ebé karik, tanba nia liu iha ha’u-nia sede suku, ha’u rasik foti kedas telefone hasai fotografia, tanba haree ba sirkulár ida dehan hosi governu katak sé de’it mak hetan karreta estadu la’o iha finadu favór hasai foto, entaun ho baze ba ida-ne’e ha’u husu ba governu atu halo investigasaun ba funsionáriu ida lori karreta ne’e,” nia informa ba Agência Tatoli, iha Bobonaro, kinta ne’e.

Entretantu, Komandante PNTL Munisípiu Bobonaro, Superintendente Antoninho Mauluta, esplika, durante ne’e membru sira halo pasa-revista iha ponte Nunura no kruzamentu Santa Cruz, Maliana, hahú hosi loron 28 to’o loron 04 novembru seidauk identifika karreta estadu ida halo viajen iha selebrasaun loron finadu.

Komandante PNTL Munisípiu Bobonaro, Superintendente Antoninho Mauluta. Imajen Tatoli/Sérgio da Cruz.

“Ami-nia operasaun iha terrenu  observa, ita-nia ulun boot sira mós barak mak halo viajen ba-mai, maibé maoria sira uza de’it karreta privadu, só karreta estadu ne’ebe la’o ba-mai mak karreta eskoltu ne’ebé polísia sira uza eskolta nai ulun sira,” nia hateten.

Nia subliña, dadaun ne’e ekipa konjunta komposta hosi Unidade Patrullamentu Fronteira (UPF), Task Forse eskuadra Atabae, Unidade Espesiál Polísia (EUP) kompostu hosi BOP no COE halo hela pasa-revista iha ponte Loes, baliza entre munisípiu Liquiça no Bobonaro maibé la deteta karreta estadu ho xapa-matríkula refere.

Nune’e mós komandu polísia munisípiu kompostu hosi membru tránzitu no Taske Force halo hela vijilánsia iha kruzamentu Santa Cruz, suku Lahomea, Maliana.

“Horisehik ita taka kedas iha ponte Loes, keta halo sira-ne’ebé fila ho karreta estadu tama subar-subar, ne’ebe ita taka to’o agora seidauk iha,” nia katak.

Notísia relevante: Ekipa fiskalizasaun bandu utilizadór viatura Estadu sirkula iha loron finadu

Jornalista         : Sérgio da Cruz

Editor               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here