Administradór Dioseze Baucau, Padre Alípio Pinto Gusmão. Imajen TATOLI/Natalino Belo.

BAUCAU, 04 novembru 2021 (TATOLI) – Administradór Dioseze Baucau, Padre Alípio Pinto Gusmão, husu sarani serbisu hamutuk hodi garante funsionamentu Dioseze Baucu hodi hein Bisipu foun hosi Vatikanu.

“Husu ba sarani sira, Padre Diosezanu tomak Dioseze Baucau nian atu ita serbisu hamutuk, kolabora atu kontinua serbisu ne’ebé Dom Basílio husik hela, liuliu misaun Igreja lokál nian tenke la’o ba oin,” Padre Alípio Pinto Gusmão, ko’alia iha resintu Igreja Katedrál Baucau, kuarta ne’e.

Administradór Dioseze Baucau foun ne’e sente todan maibé prontu serbisu hodi governa Dioseze Baucau tanba Igreja Katólika lakon bibi-atan di’ak Dom Basílio do Nascimento ne’ebé lidera Dioseze Baucau durante tinan 24 laran.

Padre Pároku Manatuto ne’e akresenta, Padre hirak-ne’ebé hola-parte iha órgaun konsultór kumpri direitu kanóniku ne’ebé fó tanba Amu Bisipu mate, sira iha obrigasaun atu hili padre ida-ne’ebé idade liu 35 atubele administra Dioseze funsionamentu Dioseze nian.

“Kna’ar ne’ebé asume atu garante funsionamentu normál vida Dioseze Baucau nian, sira hili ha’u atu asume kna’ar ida-ne’e, ha’u sente todan idade sei nurak, esperiénsia ladún barak, ho konfiansa no misaun uma-kreda ne’ebé fó ba hau-nia liman, ha’u sei haka’as-aan, liuliu mak Dioseze ne’e nia moris, vida, administrasaun sira kontinua to’o Bispu foun mai,” nia katak.

Padre Alípio promete atu kontinua prepara ba selebrasaun loron aniversáriu Dioseze Baucau nian ba tinan-25 ne’ebé mak antes ne’e Bispu Dom Basílio hamutuk ho komisaun estabelese ona no tuir planu abertura iha loron 30 outubru.

Iha fatin hanesan, Prezidente Konferénsia Episkopál Timorense (CET, sigla Portugés) no Bispu Dioseze Maliana, Dom Noberto Amaral, husu atu padre inklui sarani sira kolabora ho Administradór Dioseze Baucau, Padre Alípio Pinto Gusmão hodi hein desizaun hosi Vatikanu.

“Sarani Dioseze Baucau nian, imi iha ona administradór dioseze nian mak Padre Alípio, nu’udar Prezidente CET husu imi-nia kolaborasaun, respeitu ba malu atu servisu didi’ak atu lori Dioseze ida-ne’e tuir dalan ne’ebé loos,” Dom Noberto fó hanoin.

Notísia relevante: Provizóriu, Padre Pároku Manatuto lidera Dioseze Baucau

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here