Osan Dollar Amerikanu. Imajen/Espesiál

DILI, 04 novembru 2021 (TATOLI)—Prezidénsia Repúblika propoin iha Orsamentu Jerál Estadu (OJE) 2022 hamutuk $10,088,413.

“Prezidente Repúblika, iha tinan oin prevé millaun $10-resin orsamentu ne’e aumenta tanba atu halo preparasaun tomada pose Prezidente foun mezmu prezidente troka maibé Prezidénsia Repúblika kontinua funsiona instituisionál nafatin normal,” Xefe Kaza Sivíl Prezidénsia Repúblika, Francisco de Vas Concelos, hateten ba jornalista hafoin ramata audiénsia públika kona-ba apresiasaun proposta OJE 2022 ho Komisaun A Parlamentu Nasionál, kinta ne’e.

Nia dehan, tinan oin lahalo programa barak tanba Prezidente Repúblika nia mandatu hela fulan neen maibé programa ne’ebé la’o ona kontinua hanesan kondekorasaun ba veteranu iha komemorasaun loron veteranu iha 03 marsu.

Iha audiénsia públika ne’e, Prezidénsia Republika relata mós progresu ezekusaun orsamentu tinan 2021 ne’ebé daudaun atinje ona 79% no razaun foin ezekuta ne’e tanba situasaun COVID-19.

Papél Prezidente Repúblika hanesan Xefe Estadu, simbolu no garante indepedénsia nasionál, unidade Estadu no regulár funsionamentu instituisaun demokrátika. Prezidente Repúblika hanesan Komandante Supremu Forsa Armada (konstituisaun repúblika artigu 74).

Tuir dokumentu livru 2-C iha 2022 Prezidensia Repúblika prevé orsamentu $10,088,413 aloka ba saláriu bensimentu $1,295,828, bens servisu $3,991,297, kapitál menór $774,500, kapitál  dezenvolvimentu $250,000 no transferénsia públika $350,001, atu finansia  programa lima, sub-programa  11 no atividade 25.

Programa lima ne’e mak hanesan, identidade nasionál sei gasta $648,242, Estadu direitu demokrátiku sei gasta $254,080, relasaun internasionál no diplomátika sei gasta $1,100,552, dezenvolvimentu sustentável sei gasta $1,423,913 ho boa-governasaun no jestaun instituisionál sei gasta $6,661,626.

Prezidensia Repúblika aprezenta estimativa ho forsa traballu funsionáriu hamutuk 256 permanente (feto 72 no mane 184), ho funsionáriu 25 ho kargu dirasaun no xefia, hosi efetivu ne’e la inklui funsionáriu nomeasaun polítika.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here