Konsellu Superiór Izlámika iha Timor-Leste, Ahmad Ali Alaiubi. Imajen TATOLI/Natalino Belo.

BAUCAU, 04 novembru 2021 (TATOLI) – Konsellu Superiór Izlámika iha Timor-Leste, Ahmad Ali Alaiubi, agradese saudozu Bispu Dioseze Baucau, Dom Basílio do Nascimento, ne’ebé tulun ona tulun ona komunidade Musulmana iha situasaun defísil.

Reprezentante Musulmanu Timor-Leste liuhosi Konsellu Superiór Izlámika, sente triste no lakon líder Katólika Dom Basílio do Nascimento ne’ebé konsideradu hanesan aman Domin na’in.

Konsellu Superiór Izlámika Timor-Leste, Ahmad Ali Alaiubi, hateten, komunidade Izlámika senti lakon tanba liuhosi Dom Basílio do Nascimento ajuda komunidade Izlámika iha situasaun defísil, tantu iha tempu okupasaun Indonézia no ukun-aan laran.

“Ha’u sente lakon liu tanba ha’u hanoin bainhira iha Indonézia nia tempu nia salva ha’u, ha’u sei idade tinan 25 tanba envolve iha klandestina, nia aman no salvadór ida ba ha’u,” Ahmad ko’alia iha resintu Igreja Katedrál Baucau, kuarta ne’e.

“Maske ha’u ema izlam, bainhira Indonézia liuhosi Komandu kaptura, sukit ha’u-nia liman, ain-kukun, Dom Basílio, padre João de Deus (matebian), Padre Locateli mak liberta ha’u hosi militár Indonezia nia liman. Ida-ne’e mak hanesan aman no ai-mahon ida ba ema Baucau no Timor-Leste hotu, la’ós de’it ba relijiaun Katólika de’it maibé mós ba sarani relijiaun seluk,” Ahmad akresenta.

Hafoin Timor-Leste ukun-aan, Dom Basílio mós sempre mosu no ajuda komunidade Musulmanu iha tempu defísil, hahú hosi tinan 2003-2007 Timor-Leste hasoru difikuldade ai-haan nune’e Dom Basílio fó osan no rekomendasaun ba komunidade Musulmanu hodi buka moris liuhosi dalan asesu kréditu.

Hosi rekomendasaun Dom Basílio nian, ajuda komunidade Musulmanu asesu ba kréditu iha banku hodi hala’o vida negósiu to’o ohin loron.

Nune’e mós liuhosi Dom Basílio konsege hamosu kooperasaun entre relijiaun sira hanesan Izlámika no komunidade Kristaun.

Nune’e, Povu Musulmanu rasik sente lakon nune’e ohin mós iha devér no responsáblidade partisipa iha serimónia fúnebre Dom Basílio iha Igreja Katedrál Baucau.

Notísia relevante: Dom Basílio haloot ona iha fatin ikusliu

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here