Komandante PNTL Munisípiu Bobonaro, Superintendente Antoninho Mauluta. Imajen Tatoli/Sérgio da Cruz.

BOBONARO,04 novembru 2021 (TATOLI) — Mota baliza entre suku Tebabui no Karabau, postu administrativu Bobonaro, munisípiu Bobonaro, hamate joven ida hafoin selebra loron matebian iha loron 02 novembru liubá.

Iha akontesimentu dezastre naturál ne’e, joven na’in rua nu’udar maun-alin, ida mate naran Francisco Barreto (14) no ida kanek naran Tomás Barreto (20). Joven na’in-rua ne’e orijen hosi aldeia Udi-Ai, suku Carabau, postu administrativu Bobonaro, munisípiu Bobonaro.

“Sira na’in-rua ne’e  dada-malu atu ultrapasa mota, maibé la konsege tanba bee lori fatuk baku tiha maun nia kelen kanek, depois nia husik nia alin mota lori, liutiha oras balu buka-tuir hetan mate-isin kait hela iha mota-ninin,” Komandante PNTL Munisípiu Bobonaro, Superintendente Antoninho Mauluta, ko’alia iha Maliana, kinta ne’e.

Kronolojia

Iha loron 02 novembru joven na’in-rua ne’e akompaña ho família ba kari ai-funan iha rate área Mali-Ubu nune’e  atu fila ba hela-fatin akontese udan-boot iha dalan-klaran no mota hahú boot nune’e joven na’in-na’in-rua ne’e tenta ultrapasa mota baliza entre suku Tebabui no Karabau, maibé volume bee maka’as ataka sira iha mota-laran, hodi rezulta mota lori sira na’in-rua, ida mate kedas no ida seluk kanek.

Tuir informasaun ne’ebé Agência Tatoli rekolla hosi família matebian katak, mate-isin Franscisco Barreto haloot ona iha nia knuua suku Karabau, iha loron kinta (04/11). Enkuantu Tomás Barreto ne’ebé kanek daudaun ne’e iha hela nia rezidénsia, maibe tuir planu aban família sei lori ba halo tratamentu saúde.

Konfrontu durante finadu

Komandu Polísia Munisípiu Bobonaro mós rejista konfrontu entre joven sira hosi grupu arte-marsiál balun iha suku Molop, postu administrativu Bobonaro.

“Iha akontesimentu ne’e rezulta joven ida kanek, momentu asalta malu ne’e la temi grupu nia naran, maibé ita identifika joven ida kanek ne’e hosi PSHT no suspeitu sira-ne’e hosi Seruling Dewata, depois ida-ne’e ha’u rasik kontaktu sira-nia líder, ba foti kedas sira lori ba eskuadra Bobonaro depois ita ba foti, komandu submete ona ba prosesu investigasaun,” nia informa.

Daudaun ne’e komandu PNTL Munisípiu Bobonaro konklui ona prosesu investigasaun no sei ba rejista iha Munistéru Publiku (MP). Enkuantu supeitu ba kazu ne’e hetan ona Termu Identidade Rezidénsia (TIR) hodi hein notifikasaun hosi MP.

Jornalista         : Sérgio da Cruz

Editor               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here