Dom Carlos Filipe Ximenes Belo, SDB. Imajen hosi pájina FB

DILI, 04 novembru 2021 (TATOLI)—Laureadu Prémiu Nobel da Paz no Eis Bispu Dioseze Dili, Dom Carlos Filipe Ximenes Belo, SDB, sente laran taridu bainhira rona notísia kona-ba Dom Basílio do Dascimento hakotu iis iha Hospital Nasionál Guido Valadares, Dili.

Notísia Relevante: Dom Basílio hakotu iis tanba enfrenta moras kardiovaskular

“Ha’u-nia kolega no belun Basílio do Nascimento Martins, Bispu Dioseze Baucau. Ha’u triste no laran taridu há’u simu notísia katak amu Basílio do Nascimento iis kotu iha Hospitál Nasionál Guido Valadares tanba hetan “atakasaun fuan”. Ita hotu triste tanba Dioseze Baucau iha tinan ida-ne’e lakon Vigário Geral (padre Francisco Pinheiro) no Amo Bispu rasik,” Amo Belo hateten liuhosi nota memorisa (hosi amo Belo) ne’ebé Agência Tatoli asesu, kinta ne’e.

Dom Carlos hetan dala uluk, labarik no seminarista Basílio do Nascimento iha Semináriu de Nossa Senhora de Fátima, iha Dare, iha tinan 1964.

Iha tempu ne’ebá, Dom Carlos frekuenta 3.º ano no nia hahú 2.º ano. Dom Carlos sira-nia nia turma ka klase (3.º ano), iha ema na’ín ualu (8) de’it: Carlos Filipe Ximenes Belo (Baucau), Francisco Aparício Guterres (Baguia), Hanrique Magno (Ainaro), Jaime Carion Lobo (Maubara), Lucas da Costa Gonçalves (Atsabe), Paulino Magno (Baguia), Paulo dos Santos Amaral (Fuiloro), Rogério Tiago Lobato (Soibada).

La kleur, Dom Carlos nia kolega balun husik Seminariu: Jaime, Lucas, Paulino, Francisco. To’o 6.ano, hela sira na’in haat de’it: Carlos Filipe, Henrique Magno, Paulo Amaral no Rogério Lobato no hosi grupu ne’e, Dom Carlos mesak mak to’o saserdósiu.

Dom Basilio sira-nia turma (2.o Ano), turma ida ke boot hamutuk ema na’in-27. Ikus mai, balun sai ema boboot de’it: Basilio do Nscimento (Bispo), Guido Diamantino Soares, Domingos Maria das Dores Soares (Colli), Francisco Ribeiro, Luís Monteiro, Antonino Gonçalves, no sira seluk tan.

Iha sira-nia leet, iha ida, ema Lautém oan ida naran Norberto Amaral, ne’ebé ulun mamar liu no hetan nota ka valór (nilai) mesak aas (18,19, etc.). Ami na’in-rua nian mak 12,13,14. Hosi grupu Dom Basilio nian, (ema na’in-27), nia de’it mak to’o saserdósiu.

Iha Semináriu de Dare, Superiór sira hili sira na’in-rua rua (Carlos Filipe ho Basilio do Nascimento) atu hala’o knaar hanesan bibliotekáriu no despenseiru. Despenseiru nia dever mak loro-loron hasai no sukat bátar ka’ut tolu ka haat, no entrega ba koziñeiru atu te’in. Loro-loron ami han bátar da’an, domingu ho feriadu mak han etu.

Han bátar da’an de’it maibé seminarista sira hetan isin di’ak, bokur no ema kbiit na’in, to’o halo Kónsul Australianu hakfodak, bainhira nia ba vizita Semináriu.

Iha tinan 1968, Paulo dos Santos Amaral no Carlos Filipe, padre Afonso Maria Nácher, SDB, haruka atu ba eskola iha Institutu Missionáriu Salesiano, iha Mogofores (Anadia, Portugal) atu sai Salesiano. Dom Basilio ho kolega seluk, amo Bispo Dom José Joaquim Ribeiro haruka ba Seminário Maior (diocesano) iha Évora (Portugal).

“Iha tinan 1977, bainhira ha’u sei estudante Teologia (hela iha Manique do Estoril), seminarista Basílio do Nascimento simu ordenasaun saserdotál iha Sé de Évora, hosi Arsebispu Dom David, (OFM). Ha’u ba asiste serimónia ordenasaun. Sé mak toka órgaun, mak seminarista timor-oan ida naran Gelásio Joaquim da Silva (ema Fatubessi).Tuir mai, ami fahe malu, ida idak tuir nia destinu,” Don Carlos haktuir.

Iha 1985, Dom Carlos hanesan ona Administradór Apostóliku Dioseze Dili nian, ba buka padre Basílio iha Évora atu ko’alia. Iha tinan 1990, Don Carlos ba fali Portugal no ba hasoru nia no husu atu nia atu fila ba Timor. Entretantu, iha “Timor Timur”, sarani sira aumenta ba beibeik to’o 700 mil.

Notísia Relevante: Biografia Bispu Basílio no bele ko’alia lian estranjeira neen

Finalmente, amu-lulik Basílio do Nascimento to’o Timor Timur 1994. Fou-foun nia simu knaar atu ba hela iha Ainaro. Ikus mai muda ba Dili. No iha tinan 1996, Amu Papa João Paulo II (ohin loron, Santu), harii Dioseze Baucau no hili amu-lulik Basílio do Nascimento ba Bispu. Iha loron 30, fulan outubru, 2021, Dom Basilio husik mundu ne’e no fila hikas ba Na’in nia Kadunan.

“Ha’u mos triste, no laran taridu. Ami be la vale buat ida no sala na’ín (liu-liu há’u) mak Na’i Maromak hili atu tau matan ba Ninia povu. Dom Basilio ba uluk ona, loron ida, há’u mos sei tuir,” Amo Belo hateten.

Iha momentu ne’e, Amo Belo hanoin Mape, Zumalai, Aileu, Baucau; hanoin senhor Victor, senhora Teresa, hanoin Meno, hanoin Aileu. No reza ba Amu Basilio nia avó, nia inan, nia aman. No reza ba Meno do Nascimento no nia família, reza ba povu Mape, Zumalai no Aileu. Reza ba Dioseze Baucau.

“Ita atu dehan tan saída? Oh!  Basílio, iha lalehan husu tulun no bensa ba ’o-nia kolega no belun ida-ne’e,” Amo Belo dehan.

Notísia Relevante: Arsebispu hato’o sentida kondolénsia ba sarani Dioseze Baucau

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here