Komandante Polísia Tránzitu Munisípiu Bobonaro, Sarjentu Xefe José Bere Soares. Imajen TATOLI/Sérgio da Cruz.

BOBONARO,30 outubro 2021 (TATOLI)— Polísia Nasionál Timor-Leste (PNTL) liuhosi komandu munisípiu Bobonaro hala’o atividade pasa-revista, iha area semitériu Santa Cruz, suku Lahomea, kona-ba kartaun vasina no viatura estadu nian.

Atvidade operasaun ne’e komandu munisípiu koloka membru Tránzitu no Task Forse na’in-10 hahú hosi tuku 8:00 dadersan. Ekipa ne’e serbisu konjunta ho  saude munisípiu Bobonaro.

Nune’e mós pasa-revista ba sidadaun ne’ebe utiliza transporte públiku hanesan anguna, bís no motorizada sira-ne’ebe seidauk simu vasina no kontrola mos viatura estadu ne’ebe halo sirkulasaun iha loron finadu la ho guia de marça.

Komunidade Bobonaro, Salvador da Costa, lamenta atividade ne’e tanba impede sira-nia movimentu atu ba selebra loron finadu hamutuk ho família iha foho.

“Ami povu ne’e iha direitu atu simu ou lae, maibe tuir ami-nia hare vasina ida ne’e hanesan obrigatóriu fali, revista ita iha dalan haruka ita ba simu vasina, ida-ne’e la justu ona ba ami povu, tanba ami atu ba selebra loron boot iha foho de’it mós  la’o ba-mai araska hotu ne’e oinsa,” nia ko’alia iha Lahomea, sábadu ne’e.

Enkuantu, Maria da Costa de Jesus nu’udar komunidade, deside simu vasina tanba hakarak obedese ba regra governu hodi luta kombate propagasaun surtu Covid-19 iha Timor-Leste.

“Ha’u simu tiha, maibé liman mak moras oituan, maibé senti di’ak hela hanesan bainbain tanba ai-moruk ne’e ita-nia nai ulun sira no ema barak mak simu ona vasina entaun ita hanesan sidadaun ida iha mós devér atu apoia programa governu nian,” nia katak.

Hatan ba preokupasaun ne’e, Komandante Polísia Tránzitu Munisípiu Bobonaro, Sarjentu Xefe José Bere Soares, esplika atividade pasa-revista kartaun vasina ne’e halo hodi apoia programa governu nian tanba sidadaun barak mak seidauk simu vasina.

“Atividade ne’e nu’udar planu operasaun komandu entaun ita junta ho saude munisípiu, ami-nia halo de’it pasa-revista, sé sira-ne’ebé atu liu tenke aprezenta kartaun vasina, karik haluha ba foti fali iha uma. Sé lakohi simu, ami la autoriza halo viajen,” nia hateten.

Komandu munisípiu Bobonaro seidauk deteta no halo apreensaun ba motorizada no karreta estadu ne’ebé kontra regra.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here