Karreta Estadu. Imajen/foti husi Google

BAUCAU, 30 outubru 2021 (TATOLI) – Komandu Pólisia Nasionál Timor-Leste (PNTL) Munisípiu Baucau hamutuk Servisu Komandu Konjunta Operasaun Koordenada (SKKOK) halo apreensaun ba karreta ida no dokumentu veíkulu no motorizada balun.

Xefe Operasaun PNTL Baucau, Inspetór Xefe Rogério dos Reis, hateten, serbisu koordenasaun ne’e inklui ekipa intergradu hosi Provedoria Direitu Humanu no Justisa (PDHJ), Komisaun Anti Korrupsaun (CAC, Sigla Portugés), Diresaun Nasionál Transporte Terrestre (DNTT), Pólisia Tránzitu no Komisaun Funsaun Publiku (KFP) halo auto stop ka pasa-revista ba viatura ne’ebé halo sirkulasaun diresaun hosi kapitál Dili, Baucau, Lautém no Viqueque.

Objetivu hosi auto stop mak hanesan meiu prevensaun ba selebrasaun loron finadu ne’ebé sei realiza iha loron 1-2 novembru. Nune’e mós pasa-revista sasán kroat ka arma brankas no dokumentu motorizada.

“Liuhosi auto stop ka passa revista ida-ne’e bele asegura ita-nia komunidade sira-ne’ebé sempre kondus ho velosidade aas, liuliu transporte públiku ne’ebé tula pasaJeiru liu kapasidade to’o balun tur iha kampaun leten nune’e labele hamosu asidente no insidente durante loron finandu,” Xefe Operasaun PNTL Baucau hateten iha Triloka, sábadu ne’e.

Tuir dadus, auto stop hala’o ona loron rua hahú hosi loron 29 fulan-outubru ekipa konjunta konsege halo apreensaun dokumentu karreta no motorizada hamutuk 77, karta kondusaun hamutuk 48, motorizada hamutuk 6 inklui save, karreta governu 1 bazea ba karta sirkulasaun hahú loron 29, oras 17:00 labele hala’o ona movimentu.

“PNTL hamutuk ho ekipa SKKOK entre oras 19:00 konsege halo apreensaun ba karreta governu ida, uza hosi institusaun governu ne’ebé halo sirkulasaun hosi Kapital Dili mai Baucau bazea ba karta serkulasaun katak hahú loron 29 oras 17:00 karreta governu sei la halo tán movimentu,” Rogério akresenta.

Nune’e, Xefe Opersaun husu atu motorista presiza kompleta dokumentu bainhira halo viajen nune’e garante katak viatura sira iha dokumentu tanba iha informasaun hosi na’in ba viatura katak karreta no motorizada balun lakon.

Tuir observasaun Agéncia TATOLI iha terrenu nota katak, maioria transporte tantu públiku no privadu hetan passa revista hanesan dokumentu motorizada inklui karta kondusaun.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here