Merkadu Maliana

BOBONARO, 30 outubru 2021 (TATOLI) — Negosiante sentru merkadu postu administrativu Maliana, munisípiu Bobonaro hetan rendimentu di’ak, molok tama ba selebrasaun loron finadu tinan 2021 nian.

Negosiante Eugenia Correia, hateten durante semana ida antes ba finadu, sira-nia sasán folin tebes iha merkadu, tanba aumenta kompradór.

“Durante semana ida-ne’e ami hetan osan di’ak loos, dalaruma loron ida ami bele hetan to’o $40 dolar, horisehik de’it ha’u hola modo $25 dolar nia la to’o lokraik ne’e hotu tiha, agora ohin loron basar hanesan ne’e ema barak modo la tahan,” negosiante ne’e informa ba Agência TATOLI, iha merkadu Maliana, sábadu ne’e.

Dezde implementasaun deklarasaun estadu emerjénsia no sarka sanitária, vendedór hosi munisípiu Bobonaro la hetan rendimentu di’ak, tanba regra limita ema-nia movimentu  hosi kapitál munisípiu ba postu administrativu sira seluk.

“Foin lalais ne’e Covid-19 ne’e ami fa’an loron tomak  mos ema la hola ida, sorti atliu ne’e loron ida ema hola $5 dolar de’it, entaun modo balu dodok no até estraga hotu, mais agora di’ak ona tanba dalan la taka ona no ema mós ba mai barak, satán finadu hanesan ne’e ami senti di’ak,” nia hatutan.

Enkuantu negosiante António de Oliveira da Costa, hateten tinan-tinan bainhira tama loron finadu nia fa’an lilin sempre hetan rendimentu di’ak, tanba dezlokasaun komunidade hosi kapitál Dili mai Bobonaro ho  numeru ne’ebé boot.

“Kuandu tempu matebian, ha’u  fa’an de’it mak lilin tanba ema mai hosi Dili atu ba sunu lilin iha foho ne’e sira sosa tiha Maliana mak ba foho, entaun ami fa’an lilin falun tolu $1 molok loraik hotu ona no ha’u bele hetan rendimentu to’o dolar $60,” nia katak.

Tuir observasaun Agência TATOLI iha merkadu Maliana, nota presu nesesidade bazika iha kioske kiik sira, loja Yangfa no supermerkadu Seara folin normál. Enkuantu presu kombustível mak folin la ekilibru tanba balu fa’an ákua boot litru rua $2 dolar, balu fa’an $1,75 no balu $1,50.

Nune’e mós transporte publiku bís diresaun Dili ba Maliana mantein presu normál $6 dolar no anguna sira movimenta ba postu administrativu Bobonaro, Cailaco no Lolotoe mós mantein presu anteriór.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here