Atividade konstrusaun estrada nasionál Baucau-Viqueque. Imajen/MOP

VIQUEQUE, 31 outubru 2021 (TATOLI)—Ministru Obra Públika (MOP), Salvador Eugênio Soares dos Reis Pires, husu entidade ne’ebé envolve iha projetu estrada nasionál Baucau-Venilale no Venilale-Viqueque, atu kontrola no asegura kualidade.

Estrada nasionál ne’e ho totál distánsia kilómetru 58, kompostu hosi Lot 1 munisípiu Baucau to’o Venilale ho naruk kilómetru 23,38 no Lot 2 Venilale to’o munisípiu Viqueque naruk kilómetru 34,62.

Diresaun MOP ne’ebé envolve iha projetu atu kontrola mak Diresaun Jerál Obra Públika (DJOP), Diresaun Nasionál Estrada Ponte, Kontrolu Seias (DNEPCC, sigla portugés) no Unidade Manajementu Projetu (PMU, sigla ingés).

“Kestaun tékniku sira, diresaun jerál no unidade jestaun projetu sira maka halo kontrolu. Ha’u-nia orientasaun ba sira maka kontinua promove projetu tuir dezeñu no kontratu ne’ebé iha no tenke asegura mós kualidade,” Ministru Salvador Eugênio hateten foin lalais ne’e iha suku Builale, postu administrativu Ossu, munisípiu Viqueque.

Notísia relevante: MOP klarifika progresu konstrusaun estrada dirasaun Baucau-Viqueque

Aleinde ne’e, Ministru orienta ona tékniku hosi PMU, tenke tun ba terrenu atu haree progresu diaria no semanál, karik iha lakuna ne’ebé halai ses hosi espefisifikasaun no kontratu.

Nune’e mós, ba parte DJOP no PMU, atu kontinua asegura kualidade investimentu iha infraestrutura ne’ebé Governu halo no husu kompañia kontratór atu kumpre kontratu, dezeñu no Bill of Quantity (BoQ) ne’ebé iha.

Antes ne’e, iha rede sosiál Facebook, públiku kestiona kona-ba kualidade konstrusaun estrada nasionál Baucau-Viqueque.

Governu liuhosi MOP lansa fatuk dahuluk konstrusaun estrada nasionál ligasaun Baucau-Viqueque, trosu 1 Baucau-Venilale, iha loron 09 agostu 2019, ne’ebé hafoin lansamentu, kompañia no superizór mobiliza kedas ekipamentu pezadu no halo levantamentu dadus ba indeminizasaun komunidade nia ai-horis no seluk tan.

Notísia relevante: MOP orienta PMU-COVEC proteje sítiu istóriku

Estrada ne’e konstrui hosi kompañia internasionál, China Overseas Engineering Group Co, Ltd (COVEG), superviziona hosi kompañia konsórsiu Intercontinental Consultants and Technocrats Pvt Lda, India in Association with Infra Consultant in the Philippines (ICP), no Dezenvolve Timor-Leste (DETILE) Consultant Lda, ne’ebé antes ne’e manán ona konkursu públiku iha Komisaun Nasionál Aprovizionamentu (CNA, sigla portugés).

Projetu ne’e liuhosi prosesu konkursu públiku hosi CNA no hetan ona vistu préviu hosi Kámara Konta.

Orsamentu ba kontrusaun estrada ne’e hosi empéstimu Banku Dezenvolvimenru Aziátiku (ADB, sigla inglés) hamutuk millaun $44, ne’ebé kompostu finansiamentu empréstimu regulár millaun $19 no empréstimu konsensionál hamutuk millaun $25 hodi halo atualizasaun estrada.

Durasaun serbisu projetu ne’e ba tinan tolu nia-laran, hahú hosi agostu 2019 no tuir planu termina iha fevereiru 2022.

Jornalista : Vitorino Lopes da Costa

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here