Viatura Estadu. Imajen TATOLI/Egas Cristóvão

DILI, 29 outubru 2021 (TATOLI)—Ekipa konjunta ba viatura Estadu halo inspesaun surpreza loron dahuluk ba utilizasaun veíkulu no motorizada Estadu, ne’ebé iha prosesu identifika kargu xefia balun ladún koopera ho responsável lojístika instituisaun.

Ekipa fiskalizasaun konjunta kompostu hosi Komisaun Antí Korrupsaun (CAC, sigla portugés), Diresaun Jerál Patrimóniu Estadu hosi Ministériu Finansa (MF), Diresaun Nasionál Transporte Terrestre (DNTT), no Polísia Nasionál Timor-Leste (PNTL), ne’ebé inspesaun loron dahuluk iha Ministériu Agrikultura no Peska (MAP) no MF.

“Durante ami inspesaun, identifika katak iha utilizadór balun liliu kargu xefia no diresaun balun ladún koopera di’ak ho responsável lojístika ministériu nian, entaun ami fó atensaun ba responsável sira katak karik utilizadór sira la koopera tenke informa ba ekipa fiskalizasaun konjunta,” Pontu Fokál CAC, Euclides Vidal Madeira, informa hafoin halo inspesaun iha MF, Aitarak-laran, sesta ne’e.

Iha loron kinta (28/10), ekipa konjunta fó xamada ida ba utilizadór viatura Estadu hotu iha instituisaun Estadu sira hotu, atu hahú oras 17:00 otl loron 29 outubru 2021, tenke estasiona patrimóniu Estadu iha instituisaun idaidak.

Notísia relevante: Ekipa fiskalizasaun bandu utilizadór viatura Estadu sirkula iha loron finadu

Xamada ne’e fó ba Ministériu no Sektretaria Estadu hotu no inspesaun ne’e ba ema hotu ne’ebé utiliza patrimóniu Estadu, maibé alvu inspesaun mak labele publika sai tanba hanesan vizita supreza.

Nune’e, durante inspesaun ekipa sira rekolla lista sira, ne’ebé utilizadór sira ne’ebé la kumpre xamada ne’ebé fó, iha sansaun tolu hanesan, administrativu, disiplinár no kriminál.

Xamada hanesan, sei la autoriza utilizadór viatura Estadu hodi desloka ba munisípiu durante loron matebiaun (finadu) no fim-de-semana, ne’ebé ba Ministériu ka Sekretaria Estadu ne’ebé iha nesesidade servisu atu halo deslokasaun ba munisípiu durante loron ne’e tenke hetan autorizasaun hosi superiór.

Tuir padraun prosedimentu profisionál ne’ebé estabelese ona, fó mandatu ba ekipa konjunta hodi halo koordenasaun no implementasaun kontrolu movimentu viatura Estadu, liliu iha ámbitu loron feriadu, fim-de-semana no períodu normál ka oras servisu ninian.

Servisu ne’ebé ekipa fiskalizadór sei halo mai ho baze ne’ebé prevee iha dekretu-lei númeru 8/2013, ne’ebé define kona-ba utilizasaun viatura Estadu, katak utiliza ba de’it finalidade servisu, entaun utiliza de’it hosi oras servisu no karik iha fim-de-semana ka loron boot maka instituisaun ida sira presiza atu halo movimentu, entaun tenke iha karta autorizasaun ida atu autoriza ninia movimentu.

Iha dekretu-lei ne’e define kona-ba períodu normál viatura Estadu, hosi dadeer tuku 07:00 otl to’o kalan tuku 19:00 otl, ne’ebé hirak ne’ebé la kumpre no laiha autorizasaun, maka sei hetan sansaun ruma.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here