Prezidente GTIM atuál Vise-Ministru Administrasaun Estatál (MAE), Lino de Jesus Torrezão, lidera enkontru GTIM iha Sentru Konvensaun Baucau, sesta (29/10). Imajen Tatoli/Natalino Belo.

BAUCAU, 29 outubru 2021 (TATOLI) – Ekipa Grupu Tékniku Interministeriál (GTIM) ne’ebé lideradu hosi Vise-Ministru Admistrasaun Estatal (MAE), Lino de Jesus Torrezão nu’udar mós Prezidente GTIM hala’o enkontru dahuluk hodi deskute prosesu desentralizasaun administrativa.

“Enkontru GTIM ne’e atu fó koñesimentu tomak kona-ba prosesu desentralizasaun ba ministériu relevante sira atu iha akordu interaorgánika ho MAE atu entrega kompeténsia mai iha Prezidente Autoridade Munisípiu,” Vise-Ministru Administrasaun Estatal, Lino de Jesus Torrezão, ko’alia iha Sentru Konvensaun Baucau (CCB, sigla Portugés) vila antiga, sesta ne’e.

Enkontru ne’e realiza bazea ba orientasaun Ministru Administrasaun Estatal, Miguel Pereira de Carvalho, ho objetivu dizemina lala’ok prosesu hodi hasa’e koñesimentu prosesu desizaun iha GTIM ba autoridade munisípiu Baucau.

Lino de Jesus Torrezão ne’ebé lidera reuniaun ne’e konsidera sorumutu dahuluk GTIM ne’e previléjiu ba Autoridade Munisípiu Baucau tanba akompanã direita lala’ok sorumutu GTIM.

Kompete ba estrutura GTIM ne’e kompostu hosi membru governu na’in-tolu; Vise-Ministru Administrasaun Estatal nu’udar prezidente, Vise-Ministra Finansa (MF), Vise-Ministru Obra Públika (MOP) no reprezentante hosi liña ministeriál seluk hanesan Diretór Jerál no Diretór Nasionál sira, eseptu hosi Ministériu Defeza no Seguransa no Ministériu Negósiu Estranjeiru no Kooperasaun (MNEK).

GTIM nu’udar órgaun koordenasaun ba desentralizasaun administrativa ho ninia misaun asegura koordenasaun órgaun no serbisu sira iha administrasaun direita, indireita estadu nian ne’ebé intervein iha formulasaun ka iha ezekusaun ba polítika desentralizasaun administrativa no podér lokál.

Daudaun ne’e, GTIM sei delibera matéria establesimentu munisípiu Atauro no rezultadu atividade verifikasaun kondisaun ezistente munisípiu ne’ebé hala’o ona hosi Sekretaria Apoiu Instalasaun Munisipál

Nune’e mós sei aprova rezultadu aktividade análize organizasionál no funsaun ba estrutura munisípiu hosi parseiru sira hodi defini pasu kona-ba melloramentu prestasaun serbisu iha munisípiu no postu admistrativu sira.

Entretantu, iha enkontru refere partisipa hosi diretór jerál no nasionál hosi liña ministeriál, Prezidente Autoridade Munisípiu Baucau, Olívio ‘Bou-Lesa’ Freitas no diretor servisu munisipál Baucau nian.

Notísia relevante: MAE husu Baucau prepara-aan ba podér lokál no eleisaun munisipál

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here