Prezidente Autoridade RAEOA, Arsénio Paixão Bano asina nota entendimentu ho Servisu Autónomu Medikamentu no Ekipamentu Saúde (SAMES). Imajen/mídia ZEESM.

OÉ-CUSSE, 29 outubru 2021 (TATOLI) — Autoridade Rejiaun Administrativa Espesiál Oé-Cusse Ambeno (RAEOA), sesta ne’e asina nota entendimentu ho Servisu Autónomu Medikamentu no Ekipamentu Saúde (SAMES) kona-ba fornesimanetu ai-moruk ba rejiaun refere.

Iha nota entendimentu daruak ne’e asina hosi Prezidente Autoridade RAEOA, Arsénio Paixão Bano no Prezidente Konsellu Diretivu SAMES, Santana Martins. Nota entendimentu dahuluk selebra ona iha 2016 liubá iha tempu Mari Alkatiri. Nota entendimentu ne’e ho kontratu rihun $300-resin.

“Ita selebra kontratu ho SAMES ne’e hodi fornese ai-moruk mai RAEOA, ne’e la’ós de’it fornese ai-moruk maibé iha mós formasaun preparasaun ba tékniku sira, fasilita mós serbisu autoridade nune’e iha futuru RAEOA bele iha rasik SAMES iha rejiaun ne’e,” Arsénio Paixão Bano, informa ba Agência TATOLI, iha edifísiu ZEESM, Oé-Cusse.

Objetivu hosi nota entendimentu ne’e atu asegura ai-moruk ba rejiaun refere no rejiaun mós iha kapasidade jere rasik ba distribuisaun ai-moruk ba to’o postu no sentru saúde sira iha territóriu enklave ne’e.

Prezidente Konsellu Diretivu SAMES, Santana Martins, hateten, estensaun hosi kontratu ne’e ho durasaun tinan-ida, kona-ba serbisu aprovizionamentu ba produtu médiku no farmásia.

Iha nota entendimentu ne’e SAMES aumenta serbisu informasaun jestaun farmasetika oinsá halo expande sistema eletróniku no atu halo instalasaun ba serbisu saúde RAEOA nian iha ospitál referénsia to’o postu no sentru saúde sira.

“Nune’e fasilita pesoál saúde sira kontrola distribuisaun ai-moruk, kontrolu estoke no kontrolu médikamentu sira ho kualidade, ” nia katak.

Jornalista: Abílio Elo Nini
Editór: Evaristo Soares Matins

PUBLISIDADEiklan

HAKEREK NO HATÁN

Please enter your comment!
Please enter your name here