Família no membru PNTL akompaña seremonia haloot mate-isin Júlia Moniz iha Semitériu Becusse. Imajen TATOLI/ Natalino Costa

DILI, 29 outubru 2021 (TATOLI)— Komandu Jerál Polisia Nasionál Timor-Leste (PNTL), ohin, ofisiálmente fó valorizasaun ikus hodi hala’o promosaun diviza ba Saudoza Primeiru Sarjentu Júlia Moniz ba postu Sarjentu Xefe.

Promosaun ne’e hala’o direta hosi reprezentante Komandu Jerál PNTL Superintendente Xefe Polísia José Soares, akompaña hosi komandante sira no famíla inklui kolega-sira, durante serimónia haloot mate-isin iha semitériu Becusse.

Tuir despaixu númeru 292/CG-PNTL/2021, dekretu lei númeru 16/2009, 18 marsu, iha artigu 12 no artigu 15 kona-ba lei rejimu promosaun hodi promove matebian hosi Primeiru Sarjentu ba titlu exepsionál postu Sarjentu Xefe.

Komandu PNTL entrega Bandeira RDTL ba Matebian nia-oan mane. Imajen TATOLI/Natalino Costa

“Manifesta, ami nia domin profundu ba familia Júlia Moniz, liuliu nia laen no oan sira ne’ebé maka inan husik hela,” Superintendente Xefe Polísia José Soares, hateten iha semitériu Becusse Dili, sesta ne’e.

Tuir nian, PNTL lakon nia rekursu di’ak ne’ebé durante koopera tebes, disiplina, hahalok di’ak, kumpre ordem komandu iha institusaun nia laran nian.

“Ha’u husu ba família liuliu ba oan-sira atu bele trata saudoza nia dokumentu hodi iha Komandu bele asesu ba inan direitu,” nia afirma.

Iha fatin hanesan, Representante Família matebian, Martinus Nahak , sente triste lakon ema di’ak ida iha família.

“ho laran susar, ha’u hato’o agradesimentu ba parte hotu liuliu PNTL, Doutór no família no Kolega hotu ne’ebé esforsu akompaña nia halo tratamentu saúde, maibé Maromak hadomi nia liu ita hotu,” Famíla agradese.

 Biografia badak  

Sarjentu Xefe Polísia Júlia Moniz, moris iha loron 22 juñu 1983, iha Suku Debos, postu administrativu Suai Villa, munisípiu Colvalima. Oan hosi  Agostinho Moniz no Afriana Nuju.

Matebian,  hahú nia estudu  iha eskola primária iha Suai Villa iha tinan 1991-1996, kontinua Ensinu Pré- Sekundária iha eskola Negeri 01 Suai  iha 1996- 1999 no kontinua frekuta nian estudu iha eskola Sekundária públika 12 Novembru Dili iha 1999-2003. No matebian halo mós estudu iha Unversaidade da Páz (UNPAZ) iha fakuldade Siensia Sosiál no umanitária.

Iha tinan 2003 matebian forma família ho Ivo Ireno Conceicão Freitas, ho oan na’in-lima, feto haat no mane ida. matebian husik nia laen ho oan na’in lima ho idade mate ho idade 38 hosik  laen no oan nain lima.   

Matebian tama iha institusaun PNTL iha 23 jullu 2011 no gradua iha 14 outubru 2011, ho diviza Ajente Polisia, nune’e iha 19 novembru tinan 2012 koloka iha Gabinete Komandu Jerál  iha departementu Relasaun Públika to’o hakotu iis.

Iha loron 27 marsu 2012 hetan promosaun diviza tranzitória hosi diviza Ajente ba postu Sarjentu no iha loron 27 marsu 2012 to’o  27 marsu 2013 hetan tan promosaun diviza pur antiguidade hosi   Sarjentu ba postu Primeiru Sarjentu.

Notísia Relevante: Komandu PNTL hato’o sentida lutu ba falesimentu Júlia Moniz

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here