Polísia hosi Unidade Marítima halo seguransa iha sentru izolamentu Vera Cruz, tersa (13/04). Imajen TATOLI/António Gonçalves

DILI, 29 outubru 2021 (TATOLI)–Ministériu Finansa (MF) liuhosi Sekretariadu Tékniku Fundu COVID-19 to’o agora seidauk halo pagamentu suplementu remuneratóriu ba pesoál liña frente Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) ne’ebé presta serbisu ba mitigasaun COVID-19.

Koordenadór Jerál Sekretariadu Tékniku Fundu COVID-19, Ernesto da Conceição Silva, informa, Sekretariadu seidauk halo pagamentu suplementu remuneratóriu ba membru seguransa no defeza sira tanba sei konfirma tan dokumentu balun ne’ebé presiza hodi kompleta molok halo pagamentu.

“Daudaun dokumentu sira iha hela prosesu verifikasaun PNTL nian, posibilidade semana oin bele realiza ona pagamentu. Enkuantu F-FDT, ami halo hela koordenasaun ho sira, ne’ebé iha buat balun ne’ebé presiza responde no ami halo analiza, balun ami tenke konsulta ho jurídiku ne’ebé daudaun ne’e ami halo hela konsultasaun ho ekipa jurídiku Ministériu Finansa,” Koordenadór Jerál Sekretariadu Tékniku Fundu COVID-19, hateten, ba Agência TATOLI via telefónika, sesta ne’e.

Notísia relevante: MF hein PNTL-MD kompleta dokumentu hodi prosesa pagamentu suplementu remuneratóriu

Bainhira ekipa jurídiku sira analiza dokumentu sira ne’e loos hotu ona, maka Sekretariadu Tékniku bele hahú ona pagamentu, maibé daudaun ne’e sei iha prosesu verifikasaun.

PNTL iha totál benefisiáriu 3.821 no totál orsamentu ne’ebé aloka ba suplementu remuneratóriu ba instituisaun ne’e hamutuk $5.130.280, ne’ebé konta ba períodu fulan-marsu to’o maiu 2021, ne’ebé daudaun iha prosesu verifikasaun no kompleta dokumentu nesesáriu balun.

F-FDTL iha benefisiáriu hamutuk 2.112, ho totál pagamentu montante $6.510.075 ba períodu fulan-fevereiru to’o agostu 2021, ne’ebé daudaun iha prosesu verifikasaun no kompleta dokumentu nesesáriu balun.

“Instituisaun seluk inklui Ministériu Saúde, to’o agora seidauk submete pedidu, maski Sekretariadu Tékniku Fundu COVID-19 sosializa ona kona-ba dekretu-lei refere no komunika ona via telefónika,” Kooordenadór Jerál ne’e akresenta.

Prezidente Repúblika, Francisco Guterres Lú Olo, promulga ona altersaun daruak ba Dekretu-Lei suplementu remunetrátoriu ba liña frente ne’ebé halo atividade profisionál iha situasaun pandemia COVID-19, ne’ebé pagamentu hahú iha marsu to’o dezembru 2021 bainhira orsamentu Jerál Estadu (OJE) 2021 ramata, karik presiza hatutan suplementu ne’e ba tinan 2022, presiza iha fali dekretu-lei foun ida.

Dekretu-Lei kona-ba suplementu remuneratóriu define profisionál elejível ba direitu hetan direitu mak médiku, efermeiru, auxiliár ba asaun médika, parteiru sira, téniku análiza laboratóriu, tékniku saúde públika, tékniku radiolojia, sira-ne’ebé ezerse funsaun iha Sala Situasaun, Sentru Integradu Jestaun Krize (CIGC, sigla portugés), motorista veíkulu, responsável sira-ne’ebé lori ema ba izolamentu obrigatóriu, elementu PNTL no F-FDTL ne’ebé envolve iha prevensaun no kontrolu COVID-19.

Nune’e mós, traballadór sira iha Autoridade de Inspesaun no Fiskalizasaun Atividade Ekonómika, Sanitária no Alimentar (AIFAESA), Diresaun Nasionál Kuarentena no Bioseguransa, Servisu Migrasaun no Autoridade Aduaneira, Servisu Nasionál Intelijénsia,  Diresaun Nasionál Seguransa Patrimóniu Públiku, no servisu autoridade ka administrasaun munisipál,  responsável ba halibur, lori no soe lixu, sira ne’ebé hola parte servisu autoridade ka administrasaun munisipál, servisu munisipál ba fornesimentu bee-moos, koveiru sira no sira ne’ebé integra iha ekipa ne’ebé hala’o servisu iha Rejiaun Adminstrativa Espesial Oé-cusse Ambeno (RAEOA).

Antes ne’e, Prezidente Repúblika promulga dekretu-lei númeru 17/2020 loron 30 abríl, hodi fó direitu ba traballadór liña frente, atu idaidak simu mós suplementu remuneratóriu ida, ho efeitu hosi marsu 2020, maibé iha fulan-setembru 2020, dekretu-lei ne’e hetan alterasaun dahuluk.

Nune’e, ho alterasaun daruak ba dekretu-lei ne’e, aumenta tan profisionál sira ne’ebé iha direitu ba hetan suplementu  remuneratóriu ne’e hanesan tékniku sira-ne’ebé partisipa iha programa vasinasaun kontra COVID-19, Guarda Prizionál, sira-ne’ebé servisu protesaun sívil, inklui bombeiru no traballadór sira seluk ne’ebé hala’o serbisu iha sentru izolamentu, profilátiku ka terapéutiku,  no sira-ne’ebé kuida pasiente COVID-19 sira hanesan tau matan ba  seguransa no servisu limpeza no mós sira-ne’ebé halo jestaun lixu.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here