Diretór Servisu Agrikultura no Peska Munisípiu Baucau, Moises Lobato Pereira. Imajen Tatoli/Natalino Belo.

BAUCAU, 29 outubru 2021 (TATOLI) – Servisu Agrikultura no Peska Munisípiu Baucau, sei distribui fini-batar hamutuk tonelada 20 ba agrikultór iha postu administrativu neen kompostu hosi Baguia, Baucau, Laga, Vemasse, Venilale no Quelicai.

“Agora daudaun ami halo preparasaun distribuisaun fini batar ba ita-nia agrikultór no grupu agrikultór sira no finadu liutiha mak ita distribui,” Diretór MAP Munisípiu Baucau, Moises Lobato Pereira, ko’alia iha Sentru Konvensaun Baucau (CCB, sigla Portugés) vila antiga, sesta ne’e.

Fini-batar ho variedade noi-mutin no sele sei distribui ba kada postu administrativu hamutuk neen iha munisípiu Baukau no tinan ne’e munisípiu Baucau hetan fini-batar barakliu tanba tinan kotuk iha de’it tonelada 15.

“Ita halo pedidu bazea ba akontesimentu dezastre ne’ebé estraga ita-nia agrikultór sira-nia batar entaun atu rekupera fali ida-ne’e ita husu fini barak,” Moises argumenta.

Moisés akresenta, ho aumenta fini-batar ba munisípiu Baucau iha tinan-ne’e bele aumenta produsaun batar hosi agrikultór sira.

Hosi observasaun Agência TATOLI, agrikultór hahú fila-rai no hamoos to’os hanesan meiu preparasaun atu kuda batar bainhira udan monu-rai.

Jornalista          : Natalino Belo

Editór                : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here