Kondisaun estrada ligasaun entre suku Cota Bo’ot mai Bobonaro Vila no Maliana. Imajen Tatoli/Sérgio da Cruz.

BOBONARO, 29 outubru 2021 (TATOLI) — Kondisaun estrada entre suku Cota Bo’ot no Oe-Leu, difikulta komunidade suku rua ne’e halo movimentasaun iha tempu udan tanba ho tahu dodok.

Xefe Suku Cota Bo’ot, Miguel Gonçalves hateten, dezde okupasaun Indonézia até Timor-Leste restaura nia independénsia ba dala-19 ona seidauk asesu estrada di’ak.

“Estrada ida-ne’e ita bele dehan inan isin-rua ida mak la’o, labarik bele abortu iha kabun, tanba tesik hosi ha’u-nia suku ba to’o iha Oe-Leu mesak kuak de’it, susar tebes ita atu liu ba-mai,” nia informa ba jornalista sira, iha Cota Bo’ot, sesta ne’e.

Problema kondisaun estrada ne’e defísil liu bainhira akontese udan monu-rai, tanba laiha drenajen ne’ebé di’ak, estrada kuak sai fali bee-nalihun hodi difikulta komunidade sira asesu ba-mai, liu-liu lori produtu lokál ba merkadu Maliana no Bobonaro vila.

Nune’e mós iha tinan hirak ba kotuk, líder komunitáriu ne’e organiza komunidade sira, tau forsa hamutuk halo manutensaun ba estrada kuak sira, maibé sira-nia obra ladura ba tempu naruk tanba udan mai sobu estraga.

“Estrada Taporema ne’e antigu, iha 2019 ha’u hasai osan privadu $600 aluga loder, maibé realidade aat nafatin, depois iha 2021 ha’u ho komunidade ami ke’e ho liman foin mak ita bele liu, maibé udan mak ami susar tebes tanba bee nakonu no tahu barak,” nia informa.

Enkuantu Komunidade Agostinho de Jesus, reforsa durante ne’e defísil tebes atu transporta inan isin-rua ba sentru saude tanba kondisaun estrada.

“Ami atu ba sentru saude Kakanea ne’e dook tebes, dalaruma inan isin-rua ne’e ami aluga de’it karreta selu $25 to’o $35 mak foin bele lori ba tanba estrada aat depois dook pesoál saude sira labele mai,” nia dehan.

Tuir observasaun Agência TATOLI, nota katak hahú hosi suku Cota Bo’ot to’o área Hol-Lak, suku Oe-Leu nia, bee halai sulin tama hotu estrada laran, halo tahu nakonu no estrada kois. Ho kondisaun estrada ne’e difikulta movimentasaun transporte públiku.

Suku Cota-bot ho iha aldeia rua mak hanesan, Aimeta no Oubue hamutuk 1.059 kompostu hosi feto 561 no mane 498 ho totál uma-kain 207.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here