Bee-moos. Imajen/Espesiál

DILI, 29 outubru 2021 (TATOLI)—Vise-Prezidente Bee Timor-Leste, Empreza Públika (BTL, E.P), Gustavo da Cruz, hateten, daudaun ne’e ekipa iha terrenu menus distribui bee-moos ba komunidade ba tanke ne’ebé estabelese iha área menus bee, tanba karreta operasionál avaria hotu.

Ba kestaun ne’e, BTL, E.P rekoñese dezafiu hirak ne’e tanba durante inundasaun iha loron 04 abríl liubá, Governu hahú halo parseria ho NGO Partisipa hodi halo atendimentu instalasaun tanke bee ba fatin menus bee no halo kontratu karreta tanke sia hodi distribuisaun bee-moos ba komunidade.

“Hafoin Governu deside kalamidade ramata, entaun hapara apoiu emerjénsia sira no servisu sira entrega filafali ba BTL, E.P, maibé ita hatene katak ami rasik foin harii iha fulan hirak nia-laran, ne’ebé loloos ami halo hela atendimentu ho karreta lima, maibé rua mak di’ak, enkuantu restu avaria hela ne’ebé iha hela ofisina hodi hadi’a, entaun ami labele halo atendimentu ba fatin hotu,” Vise-Prezidente BTL, E.P informa ba Agência TATOLI, via telefónika, sesta ne’e.

Notísia relevante: BTL, E.P kálkulu kustu estragu sistema bee hamutuk millaun $2,5

Tanba ne’e, atendimentu balun ne’ebé daudaun empreza estatál halo rutina mak lori bee-moos ba eskola sira tanba BTL, E.P halo parseria ho United Nations Children’s Fund (UNICEF), ne’ebé hetan apoiu karreta tanke foun ida atu lori bee ba eskola sira, nune’e estudante sira bele fase liman hodi prevene COVID-19.

“Tanba ne’e, ami husu ba komunidade hotu atu pasiénsia, tanba BTL, E.P kontinua halo esforsu karreta ho di’ak no sei ami sei halo serbisu normál iha situasaun hanesan ne’e, tanba ne’e husu ba komunidade atu halo kontaktu ba ami-nia diresaun atu halo atendendimentu ba imi,” Gustavo da Cruz hameno.

Antes ne’e, Governu hola inisistiva atu transforma Diresaun Jerál Água no Saneamentu (DGAS, sigla portugés) ba Empreza Públika (BTL,E.P) ho hanoin ida atu hasa’e prestasaun servisu no atendimentu ba konsumidór bee-moos iha Timor-Leste.

Inundasaun ne’e’ebé akontese foin lalais rezulta kanalizasaun ka sistema bomba bee-moos iha Dili  estraga hamutuk 26, maibé parte tékniku hadi’a hotu ona, maski iha fatin balun sei menus bee-moos, maibé ho koordenasaun parseiru internasionál sira, BTL, E.P fornese bee ba komunidade liuhosi tanke bee. 

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here