Grupu Manukokorek hosi Postu Administrativu Ataúro, Suku Cristo Rei, Munisípiu Dili sai vensedór iha kompetisaun kulinária. Imajen Tatoli/Nelia Fernandes.

DILI, 29 outubru 2021 (TATOLI)—Grupu Manukokorek hosi Postu Administrativu Ataúro, Suku Cristo Rei, Munisipiu Dili sai vensedór iha kompetisaun kulinária, iha selebrasaun loron aniversáriu sidade Dili ba dala-252.

Notísia Relevante: AMD selebra aniversáriu sidade Dili 252 ho kompetisaun kulinária

“Sai vensedór ba kompetisaun kulinária ne’e, ha’u sente kontente no la sente katak ohin loron aminia grupu bele sai vensedór iha kompetisaun kulinária ne’e, Ha’u sente orgullu mós bele mai partisipa iha eventu ba loron ida-ne’e, tanba loron ohin aniversáriu sidade Dili ba dala252,” Jerente Grupu Manukokorek hosi Postu Administrativu Ataúro, Leocadia de Araújo, hateten ba Agência Tatoli, iha edifísiu Administrasaun Munisipál Dili, sesta ne’e.

Iha kompetisaun kulinária ne’e, grupu Manukokorek hatudu nia matenek tein nian liuhosi tein etu no halo modo hanesan kalderada, bifi, bifi paulitu, ikan karíl, agusál, inklui halo modo aifarina tahan, aidila funan, kabura no budu tasi.

Iha biban ne’e mós, jerente grupu Manukokorek ne’e akresenta sai vensedór ba kompetisaun kulinária no hetan premiu ho orsamentu hamutuk $400, no hosi orsamentu ne’e sei fahe fali ba membru kolega grupu ne’e nian tanba grupu iha ema na’in-neen.

Iha sorin seluk, Koordenadór Juri ba Kompetisaun Kulinária, Leopoldo Moniz, hateten kompetisaun kulinária ne’e, ekipa juri sira halo avaliasaun bazea ba kritériu lima ne’ebé sai hanesan matadalan ba ekipa juri hodi observa no foti desizaun ikus grupuu ida-ne’ebé mak sai vensedór.

“Hosi kritériu lima ne’e, ida haree ba kestaun ijiéne, nutrisaun, estatetika konaba oinsá sira halo preparasaun ba aihan, oinsá sira forma aihan tuir menu ne’ebé preparadu, durasaun tempu no ikus liu liga ho sabór ba hahan ne’ebé sira fornese iha meza,” nia esplika.

Hosi kritériu sira-ne’e, ekipa juri observa no avalia katak grupu Manukokorek prenxe duni kritériu ba kompetisaun ne’e, nune’e hili sira sai vensedór ba kompetisaun ne’e.

“Grupu Manukokorel hosi Ataúro sai vensedór, tanba sirania performa liga ba kestaun ijiéniku no seluk haree ba sira utiliza uniforma ne’ebé sira uza, hosi vistuaariu (jaket) ne’ebé estandar hanesan restorante boot sira-nian no luvas ne’ebé sira uza. Enkuantu, liga ba hahan Grupu Manukokorek iha nia hahan úniku uuitoan ne’ebé sira prepara hanesan aihan tradisionál sira,” nia dehan.

Materiál ne’ebé komisaun organizadóra prepara iha ne’ebá iha varias modo hanesan modo-tahan liga ba kabura, kanku no aidila funan. Alende ne’e, iha mós manu-tolun, ai-fuan no tomate, hosi materiál hirak ne’e sira hamosu menu mai hosi sirania kreatividade rasik.

“Hosi kreatividade ne’e, ami haree diferensa ho postu administrativu lima seluk. Entaun, hosi ne’e ekipa juri halo avaliasaun, foti valór no termina Ataúro mak sai vensedór,” nia informa.

Entretantu iha kompetisaun kulinária ne’e grupu Manukokorek hosi postu administrativu Ataúro sai vensedór no hetan orsamentu ho totál $400, grupu Ralerr CR hosi postu administrativu Cristo Rei sai manan-na’in daruak ho $325, grupu Metinaro-oan hosi postu administrativu Metinaro sai manan-na’in datoluk ho $275, grupu Feto Madohi hosi postu administrativu Don Aleixo sai manan-na’in dahaat ho $225, grupu Lafaek hosi postu administrativu Nain Feto sai manan-na’in dalima ho $175 no grupu Colmera hosi postu administrativu Vera Cruz sai manan-na’in da neen ho hetan $150.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here