Pesoál Saúde hatudu vasina Pfizer, molok atu oferese ba estudante sira, kuarta (27/10). Imajen TATOLI/António Gonçalves

DILI, 29 outubru 2021 (TATOLI)–Estudante hamutuk na’in 1.404 iha Eskola Ensinu Sekundáriu Jerál (ESJ) 04 setembru UNAMET Balide, ho idade 12 to’o 17 simu ona vasina Pfizer, hahú segunda (25/10).

Diretór Eskola ESJ 04 setembru UNAMET Balide, Sérgio da Cruz, hateten, atividade kampaña advokasia ne’ebé parte saúde halo ba inan-aman sira iha sábadu (23/10), hanesan pasu di’ak hodi konvense inan-aman foti desizaun ba oan nia saúde.

“Ha’u bele dehan kuaze inan-aman sira asina hotu formuláriu hodi aseita oan sira simu vasina Pfizer, ida-ne’e la obriga. Estudante iha ne’e hamutuk 2.104, ne’ebé daudaun ne’e iha ona estudante 1.404 mak vasina ona, falta estudante 700-resin mak seidauk,” Diretór Eskola informa ba Agência TATOLI, iha ninia knaar fatin, Eskola UNAMET iha Balide, sesta ne’e.

Notísia relevante: Estudante eskola neen iha munisípiu Dili hahú simu vasina Pfizer

Kona-ba estudante ne’ebé seidauk simu vasina, parte eskola prepara ona oráriu kontinuasaun vasina Pfizer.

“Atividade vasinasaun sei hahú fali iha loron 05 novembru, hafoin loron matebian, espera metade estudante ne’ebé seidauk vasina ne’e bele kompleta iha faze tuir mai,” nia akresenta.

Enkuantu, iha Eskola ESJ Nicolau Lobato, Eskola Ensinu Báziku Sentrál (EBC, sigla portugés) Cristal, no Eskola Tékniku Vokasionál Hera seidauk realiza atividade vasina tanba foin prepara atu halo kampaña advokasia ho inan-aman sira.

Diretór eskola ESJ Nicolau Lobato, Marcos Soares Paicheco, hateten, parte eskola foin mak kria oráriu kampaña advokasia ba inan-aman sira ne’ebé sei hahú iha loron 09 novembru.

“Kampaña advokasia ramata maka ita sei trasa fali oráriu vasinasaun ba estudante sira,” nia tenik.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here