ONG BIFANO, sesta (29/10/2021) apoia nesesidade bázika ba Ema ho Defisiénsia. Imajen Tatoli/Abílio Elo Nini.

OÉ-CUSSE, 29 outubru 2021 (TATOLI) — Organizasaun Naun Governamentál (ONG) Binibu Faef Nome (BIFANO) apoia nesesidade bázika ba Ema ho Defisiénsia hamutuk na’in-150 iha suku neen iha Rejiaun Administrativa Espesiál Oé-Cusse Ambeno (RAEOA).

“BIFANO apoia ona na’in-150, na’in-102 seidauk hetan, tanba ne’e hamutuk ho lideransa komunitária suku sira husu tán apoiu iha Autoridade RAEOA atu kompleta distribuisaun, nune’e iha tempu badak kontinua halo distribuisaun ba sira,” Diretór BIFANO, Jacinto Mala, informa ba Agência TATOLI, iha edifísiu BIFANO, Masin, Oé-Cusse, sesta ne’e.

Nesesidade ne’ebé apoia ba Ema ho Defisiénsia na’in-150 ne’e maka hanesan, kada ema-ida hetan foos saka-rua, bimoli litru-lima, masin, kafé, midar no sabaun.

Objetivu hosi tulun ne’e atu hakmaan sira-nia nesesidade ekonomia família nian no hatán ba nesesidade moris nian hodi hadi’a padraun ekonomia família ho defisiénsia.

Tuir BIFANO nia observasaun ema ho defisiénsia hatodan de’it ema sira-ne’ebé hela besik ka hamutuk ho sira, tanba ne’e atu asegura distribuisaun ai-hán, bele la’o ho susesu ka efetivu no la mosu diskriminasaun iha família.

Atividade ne’e hala’o hetan apoia fundu hosi OXFAM ho programa Australian Project Humanitária (APH) atu tulun defisiénsia sira iha rejiaun Oé-Cusse. Nune’e ONG BIFANO serbisu hamutuk ho komisaun jestaun dezastre suku sira halibur dadus ba ema ho defisiénsia iha suku-neen (6), Ban-Afi, Usitasa’e, Bobokase, Lifau, Nipani no Cunha hamutuk na’in-252.

Entretantu, totál benefisiáriu apoia ba defisiénsia iha suku neen (6) mak hanesan, iha sub-rejiaun Nítibe, suku Ban-Afi, hamutuk na’in-50 maibé hetan ona apoia na’in-26. Hosi parte sub-rejiaun Oésilo, suku Usitasa’e, hamutuk na’in-60 no na’in-20 hetan ona apoia.

Hosi parte sub-rejiaun Pante Makassar, suku Cunha, hamutuk na’in-17 no na’in-hitu (7) hetan ona apoia, suku Bobokase hamutuk na’in-20 no na’in-lima (5) hetan ona apoia, iha suku Lifau hamutuk 54 no na’in-29 hetan ona tulun,  suku Nipani hamutuk na’in-51 no na’in-17 hetan ona tulun.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here