Vise-Ministru, MAE, Lino de Jesus Torrezão. Imajen TATOLI/Egas Cristóvão

BAUCAU, 12 outubru 2021 (TATOLI) – Vise-Ministru Admistrasaun Estatal, Lino de Jesus Torrezão, garante munisípiu Baucau sei atinje alvu númeru partisipasaun vasina tanba daudaun ne’e atinje ona pursentu 70.

“Ha’u espera katak to’o 80% tanba tama ona iha 70% resin, espera katak Baucau bele atinje,” Lino de Jesus Torrezão, ko’alia iha Sentru Konvensaun Baucau (CCB, sigla Portugés), sesta ne’e.

Vise-Ministru Administrasaun Estatal ne’e destaka ba munisípiu Baucau hahú kedas iha fulan setembru to’o outubru hodi halao kampaña vasinasaun nu’udar meiu kombate informasaun hoax hodi enkoraja populasaun simu vasina.

Diretór Servisu Saúde Munisípiu Baucau, Domingos Reinaldo da Costa Guterres, hateten ekipa vasinasaun sei kontinua tama-sai uma atu dezamiña informasaun no fó vasina ba komunidade ne’ebé seidauk vasina.

“Sei la’o nafatin, ita buka atu komunidade sira-ne’ebé seidauk asesu tenke vasina hotu tanba bainhira ita tama-sai uma komunidade hahú komprende ona, balun ne’ebé uluk lakohi, agora hakarak ona tanba ne’e kuandu vasina hotu di’ak liután,” Domingos hateten.

Tuir dadus hosi saúde munisípiu ne’ebé Agénsia TATOLI asesu, totál komunidade ne’ebé vasina ona AstraZeneca doze dahuluk hamutuk 57.601 (79%) no doze daruak hamutuk 47.217 (64%) hosi totál alvu 73.317.

Hosi númeru refere, Munisípiu Baucau lokaliza fatin vasinasaun iha sentru saúde hamutuk hitu kompostu hosi Sentru Saúde Uailili, Baguia, Bucoli, Laga, Quelicai, Vemasse, Venilale, Ria-mare, Ossoqueli no Ospital Rejionál Eduardo Ximenes (HorEX, sigla Portugés).

Jornalista         : Natalino Belo

Editor               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here