Prezidente Parlamentu Nasional, Deputadu Aniceto Longuinhos Guterres Lopes, hamutuk ho Ministru Edukasaun, Juventude no Desportu, Armindo Maia, lansa kampaña nasional vasinasaun, iha suku Cota Bo’ot, Bobonaro, sesta (29/10). Imajen TATOLI/Sérgio da Cruz,

BOBONARO, 28 outubru 2021 (TATOLI) — Prezidente Parlamentu Nasionál, Deputadu Aniceto Longuinhos Guterres Lopes, reforsa Ministru Edukasaun, Juventude no Desportu (MEJD), Armindo Maia, enkoraja komunidade suku Cota Bo’ot, postu administrativu Bobonaro, munisípiu Bobonaro simu vasina.

“Sé vasina ne’e mak ladi’ak karik, ami ne’ebé tuur iha Governu no Parlamentu Nasionál ne’e mós ohin loron laiha ona imi-nia oin, tanba ami mak simu uluk tiha ona, ne’e nia laiha impaktu mak ohin loron ami ba-mai saude di’ak nafatin ne’e,” Prezidente Parlamentu Nasionál, lansa kampaña vasinasaun iha suku Cota Bo’ot, sesta ne’e.

Relasiona ho pandemia Covid-19 afeta Timor-Leste no sai preokupasaun mundiál, estadu no governu iha devér atu proteje populasaun hosi pesti ne’e liuhosi vasinasaun.

“Ami tama-sai aldeia no suku atu tuku imi-nia odamatan hodi habelar informasaun, maibé la’ós atu obriga ita boot sira, maibé moras aat ida-ne’e perigu tebes ba ita-nia vida. Dalan úniku mak tenke vasina atu aumenta ita-nia imunidade luta hasoru moras ne’e,” xefe lejizladór ne’e fó hanoin ba komunidade.

Ministru Edukasaun, Juventude no Desportu, Armindo Maia, hatutan vasina nu’udar dalan únika atu asegura ema-nia saude, nune’e halo prevensaun hasoru pesti ne’e.

“Vasina ne’e mak uluk ita halo funu karik hanesan kakaluk, kilat musan ema tiru karik labele kona ita, entaun ai-moruk ne’e Governu fó ba imi tanba hadomi imi-nia saude, la’ós atu oho imi,” nia fó hanoin.

Governante ne’e argumenta, dezde implementasaun programa vasinasaun, líder nasionál sira hanesan, Xanana Gusmao, Taur Matan Ruak, Lú Olo, Ramos Horta, Lere Anan Timur no Mari Alkatiri simu ona vasina kompletu.

“Ne’e duni ha’u husu ba komunidade sira atu voluntariamente mai simu vasina, atu ita-nia atividade ekonomia no kulturál bele la’o hanesan bainbain, sé imi lakohi simu mós nia impaktu ne’e sei iha,” nia hateten.

Entertantu Xefe Suku Cota Bo’ot, Miguel Gonçalves, agradese ba líder na’in-rua tanba bele tún direita hodi fó informasaun ne’ebé ho loloos ba komunidade.

“Ohin, ha’u rasik mak simu uluk vasina primeiru atu sai ezemplu ba ha’u-nia povu, tanba sira mak hili ha’u la’ós partidu mak hili ha’u atu kaer ukun, ne’e ami fiar katak komunidade sira barak mak sei mai simu vasina tanba rona ona informasaun klaru hosi ita-nia nai ulun sira,” xefe suku ne’e enkoraja komunidade.

Entretantu suku Cota Bo’ot iha aldeia rua ho totál populasaun hamutuk 1.059 kompostu hosi feto 561 no mane 498 ho totál uma-kain 207.

Enkuantu Postu Administrativu Bobonaro, iha suku 18 ho populasaun ne’ebé elijível atu simu vasina hosi idade 18 ba leten ho komorbilidade hamutuk 14,012. Hosi númeru ne’e na’in 5,823 mak simu ona doze dahuluk no na’in 2,528 kompleta ona doze.

Purtantu dadus ne’ebé fó-sai hosi Servisu Saúde Bobonaro katak, populasaun Bobonaro ne’ebé simu ona vasina AstraZeneca doze dahuluk 32,883, doze kompletu hamutuk 17,866 no totál taxa kobertura Covid-19 atinje ona 57,9%.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here