Atividade simulasaun dezastre naturál, iha salaun administrasaun munisípiu Viqueque, kinta (28/10). Imajen TATOLI/Vitorino Lopes da Costa

VIQUEQUE, 28 outubru 2021 (TATOLI)–Sekretaria Estadu Protesaun Sivil (SEPS) no Care Internasionál aprezenta planu simulasaun dezastre naturál ba autoridade lokál sira iha munisípiu Viqueque.

Objetivu realiza atividade ne’e atu hasa’e komunidade nia koñesimentu hodi halo prevensaun rasik bainhira mosu dezastre naturál.

“Ohin ita realiza sorumutuk ho autoridade sira, atu trasa planu simulasaun ba prevensaun dezastre naturál ba suku. Tanba ne’e, ita tuur hamutuk hodi fó hanoin, nune’e bele realiza atividade simulasaun ba komunidade bele komprende bainhira mosu dezastre naturál sira bele halo jestasaun rasik,” Reprezentante Diresaun Nasionál SEPS, Laurentino do Carmo, hateten ba Agência TATOLI, iha salaun administrasaun munisípiu Viqueque, kinta ne’e.

Nune’e, SEPS no Care Internasionál halo prátika simulasaun ba komunidade hodi aumenta kapasidade, nune’e bainhira akontese dezastre iha área risku, komunidade iha ona kapasidade bele evakua ba fatin seguru.

“Hosi Diresaun Jestaun Risku Dezastre Naturál, ami hakarak hato’o agradese ba parseiru sira ne’ebé durante serbisu halo esforsu hodi tulun vítima dezastre naturál sira iha munisípiu Viqueque,” nia akresenta.

Tuir planu simulasaun ne’e hahú implementa iha suku lima no iha postu administrativu lima.

Iha fatin hanesan, Administradór munisípiu Viqueque, Januário Soares ‘Boly’, hateten, sorumutu ne’e importante tebes hodi bele tau hanoin hamutuk halo simulasaun dezastre ba komunidade.

“Tanba ne’e, ita tenki iha planu no halo atividade simulasaun hodi hasa’e komunidade nia koñesimentu halo prevensaun, liuliu ba komunidade ne’ebé besik mota no besik foho sira,” nia tenik.

Atividade ne’e, partisipa hosi funsionáriu SEPS Viqueque, ekipa Care Internasionál, Bombeiru, no Xefe suku sira iha munisípiu Viqueque.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here