Sekretáriu Rejionál Asuntu Agríkultura, José Eta. Imajen/Mídia SRAA-RAEOA.

OÉ-CUSSE, 28 outubru 2021 (TATOLI)— Autoridade Rejiaun Administrativa Espesiál Oé-Cusse (RAEOA) lideradu Arsénio Paixão Bano, harii ona grupu no asosiasaun ualu (8) atu prodús fini komersiál kada tinan.

“Asosiasaun lima no grupu tolu foku liu bá produsaun fini komérsiál ho objetivu prodús fini produtu lokál Oé-Cusse nian kada tinan,” Sekretáriu Rejionál Asuntu Agrikultura, José Eta, informa ba Agência TATOLI, iha Horta, Oé-Cusse, kinta ne’e.

Asosiasaun lima ne’e komposta hosi Meco-Sikaloti, Eno Naek, Banofa-Pássabe, Kisan-Kalbikase no Tasa’e-Sele. RAEOA mós grupu tolu ne’ebé ho objetivu prodús  fini komersiál mak hanesan Bisalu, Sorte-Aenmat no Moris Hamutuk

Asosiasaun Meco-Sikaloti ne’ebé lokaliza iha suku Naimeco, sub-rejiaun Pante Makassar envolve membru na’in-16 prodús fini fore rai kada tinan no asosiasaun Eno Naek lokaliza iha suku Lifau envolve membru na’in-16 prodús fini batar noi-mutin.

Iha sub-rejiaun Pasabe, suku Abani, asosiasaun Banofa-Pássabe envolve membru na’in-16 prodús fini fore-rai no asosiasaun Kisan-Kalbikase lokaliza iha sub-rejiaun Nítibe, suku Lela Ufe envolve membru 34, prodús fini batar noi-mutin.

Nune’e mós asosiasaun Tasa’e-Sele ne’ebé lokaliza iha sub-rejiaun Oésilo, suku Uistasa’e envolve membru na’in-34 prodús fini batar noi-mutin.

Entretantu grupu Bisalu envolve lokaliza iha sub-rejiaun Oésilo, suku Usitaqueno envolve membru na’in-15 prodús fini mark-midar, grupu Sorte-Aenmat lokaliza iha sub-rejiaun Pante Makassar, suku Lalisuk envolve membru na’in-lima (5) prodús fini-hare, fore-rai no ai-farina.

Purtantu grupu Moris Hamutuk lokaliza iha sub-rejiaun Nítibe, suku Bene-Ufe envolve membru na’in-lima (5) prodús fini ai-farina no fehuk.

Jornalista       : Abílio Elo Nini
Editór             : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here