PDHJ liuhosi Unidade Territoriál Bobonaro, fahe informasaun kona-ba kna’ar provedoria nian ba eskola CAFE Maliana. Imajen TATOLI/Sérgio da Cruz.

BOBONARO, 28 outubru 2021 (TATOLI) — Provedoria Direitu Humanu no Justisa (PDHJ) liuhosi Unidade Territoriál Bobonaro, kinta ne’e fahe informasaun  ba estudante sira iha Sentru Aprendizajen no Formasaun Eskolár (CAFE), Maliana kona-ba governasaun di’ak no kna’ar provedoria nian.

Objetivu hosi atividade ne’e atu hasa’e estudante sira-nia koñesimentu oinsá bele proteje no promove direitu umanu iha Timor-Leste.

“Ohin, ita mai fahe informasaun kona-ba kna’ar  PDHJ nian, governasaun di’ak, oinsá hato’o keixa, violasaun direitu umanu  entaun liuhosi atividade ne’e estudante sira bele iha koñesimentu natoon, partilla tutan ba inan aman, komunidade no sosiedade tomak kona-ba direitu umanu,”  Diretór PDHJ Maliana, Domingos Pinto Tavares, ko’alia iha Maliana.

Iha sensibilizasaun ne’e PDHJ esplika kona-ba vizaun, misaun, prinsípiu báziku direitu umanu, governasaun di’ak no oinsá atu hato’o keixa bainhira hetan violasaun direitu umanu hosi ema seluk.

Entertantu Estudante CAFE Maliana, Crispim dos Santos, konsidera atividade ne’e importante tebes tanba iha koñesimentu kona-ba papél PDHJ nian.

“Dala-barak ami la hetan informasaun loloos kona-ba violasaun direitu umanu, boa governasaun (governasaun di’ak), atu ami mós bele prepara ami-nia aan sai lidernsa ida di’ak iha futuru”, nia katak.

Entretantu totál estudante iha eskola CAFÉ Maliana hosi pre-eskola to’o désimu-segundu anu hamutuk 700-resin.

Jornalista : Sérgio da Cruz

Editór     : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here