Max Stahl. Imajen/Espesiál

DILI, 28 outubru 2021 (TATOLI)– Jornalista Christopher Wenner ho koñesidu Max Stahl ne’ebé filma masakre Santa Cruz 12 Novembru 1991 hakotu ona peregrinasaun iha mundu, maibé nia istória no kontribuisaun ba luta Timor-Leste nian sempre  iha memória povu nia fuan.

“Ita nia jornalista Max Stahl mate ona, maibé nia istória sei lakon iha Timor-oan nia memória no la lakon iha Timor nia fuan,” Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, hateten ba Jornalista sira iha Fatuhada, kinta ne’e.

Notísia Relevante: Max Stahl luta ba umanidade: “In Cold Blood: The Massacre of East Timor”

Tuir Lere, Max Stahl nia filmajen iha masakre Santa-Cruz, iha 12 novembru 1991 fanu mundu nia matan ba luta libertasaun pátria povu Timor-Leste hosi okupasaun ilegál Indonézia.

Nune’e, Eis Gerileiru ne’e hato’o sentidu lutu ba falesimentu éroi Max Stahl ne’ebé hakotu iis iha kinta (18/10), tuku 4:33, madrugada iha Ospital Princess Alexandra, Brisbane, Austrália.

Max Stahl simu kondekorasaun Ordem da Liberdade hosi Estadu Timor-Leste hanesan aktu valorizasaun ne’ebé aas tanba kontribuisaun ba luta ida-ne’e liuhosi filma akontesimentu masakre Santa Cruz parte ida halo mudansa ba atitude hodi fanu komunidade internasionál oinsá atu apoia independénsia nasaun nian ne’ebé okupa ilegalmente hosi Indonézia.

Cristopher Wenner hahú koñesidu bainhira inísia nia ligasaun ho Timor-Leste iha 30 agostu 1991 hanesan turista no tama iha territóriu atu halo filmajen dokumentáriu ba televizaun independente ingleza nian.

Bainhira Max Stahl prezente iha Timor hasoru líder rezisténsia barak hodi entrevista kona-ba situasaun Timor-Leste nian iha tempu okupasaun ilegál Indonézia.

Max Stahl nu’udar jornalista dahuluk ne’ebé hasoru gerilleiru sira iha 1995 no 1996 iha Viqueque, ikusmai hasoru komandante Daitula no Komandante Nino Conis Santana, hodi hato’o reportajen katak rezisténsia povu Timor nian sei eziste.

Notísia Relevante: Max Stahl luta ba umanidade: “In Cold Blood: The Massacre of East Timor”

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here