Xefe suku Ahic, Hercilio Soares. Imajen TATOLI/Vitorino Lopes da Costa

VIQUEQUE, 28 outubru 2021 (TATOLI)–Xefe suku Ahic, postu administrativu Lacluta, munisípiu Viqueque, Hercilio Soares, hateten, progresu Uma Kbiit Laek (UKL), iha aldeia Nicradek, suku Ahic daudaun atinje ona ba 65%.

“Agora hein tau besi no taka kalen de’it ona. Iha fulan-setembru ne’e udan hela de’it, entaun fornesedór sira susar atu hatama materiál konstrusaun,” Xefe suku Ahic informa ba Agência TATOLI, iha salaun administrasaun munisípiu Viqueque, kinta ne’e.

Tuir líder komunitáriu ne’e, iha setembru konstrusaun ladún la’o tanba impaktu hosi mudansa klimátika, ne’ebé halo udan hela de’it, maibé daudaun konstrusaun la’o normál hafoin udan para iha fulan-outubru ne’e.

“Fulan kotuk labele halo konstrusaun tanba suku Ahic iha liu área remota, ne’ebé karreta lori materiál mós susar atu tama,” nia akresenta.

Iha fatin seluk, Diretór PNDS, Higinio Posinato Zamor e Silva, relata, konstrusaun UKL iha postu Lacluta daudaun la’o di’ak.

“Iha fulan kotuk ita hasoru situasaun udan hela de’it, entaun difikulta fornesedór sira tanba suku balun iha liu área rurál. Tanba ne’e, iha suku balun foin atinje progresu serbisu kiik, maibé ha’u sei akumula hotu persentajen UKL iha postu lima notu maka fó sai ba públiku,” nia hato’o.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here