Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hamutuk ho lia-na’in suku Usistasa’e, hahú aplika regulamentu tara-bandu. Imajen Agência TATOLI/ Abílio Elo Nini.

OÉ-CUSSE, 28 outubru 2021 (TATOLI)— Projetu kanalizasaun bee-moos iha aldeia Nemun, suku Taiboko, sub-rejiaun Pante Makassar, Rejiaun Administrativa Espesiál Oé-Cusse Ambeno (RAEOA) benefísia komunidade uma-kain 475 ho abitante 2.043.

“Ha’u ho téknika sira ba haree obra ne’e kualidade no ba oin sei fó bee-moos ba komunidade uma-kain 475 ho abitante 2.043. Ida-ne’e orgullu boot ba autoridade, kuandu gasta osan Estadu tenke fó benefísiu ba komunidade hodi uza ba tempu naruk,” Prezidente Autoridade RAEOA, Arsénio Paixão Bano, informa ba Agência TATOLI, iha Oé-Cusse, kinta ne’e.

Prezidente Autoridade ne’e observa ona obra ne’e progresu serbisu atinje ona 72% no espera tempu badak kompañia bele termina nune’e autoridade entrega ba komunidade sira.

Tanba autoridade lakohi akontese tán problema bee-moos, entaun tinan ida-ne’e tenke rezolve, konserva bee-matan sira, halo kanalizasaun nomoos halo perfurasaun kuaze projetu 20 ba bee-moos.

Xefe Suku Taiboko, Joaquim Tafin, agradese ba autoridade tanba fó prioridade ba bee-moos no halo konservasaun bee-matan rua iha aldeia Ulas.

“Harii ona kanalizasaun bee-moos iha ha’u-nia komunidade nia leet, fasilidade ne’e sei rezolve komunidade iha aldeia rua, bairru-sia (9), kobre uma-kain 475 ho populasaun rihun rua-resin,” nia orgullu.

Konstrusaun projetu kanalizasaun ne’e ezekuta hosi empreza Noemnasi Unipesoál Lda, ho kontratu $155,821.85 aloka hosi Orsamentu Jerál Estadu (OJE) 2021 ho durasaun servisu fulan-10.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here