Escola Sekundária Colégio São Miguel Arcanjo. Comoro, Imajen TATOLI/Egas Cristóvão

DILI, 28 outubru 2021 (TATOLI)–Ministériu Obra Públika (MOP) fó tempu tinan-ida ba Eskola Sekundaria Colégio São Miguel Arcanjo atu kontinua hala’o atividade ensinu aprendizajen iha eskola refere, hodi hein desizaun Governu prepara fatin atu hari edifísiu foun.

Eskola ne’e tama iha área libertasaun ba projetu alargamentu estrada Rotunda Comoro to’o Tasi-tolu, ne’ebé hanesan parte ida hosi projetu Portu Tibar ne’ebé tuir planu sei finaliza tinan oin.

Diretór Eskola São Miguel Arcanjo, Armindo Crisna Sacramento, hateten, parte eskola no MOP iha ona konkordánsia, bainhira atu sai hosi fatin ne’e tenke muda ba fatin dignu.

“Signifika sira (Governu) sei prepara kondisaun (rai) ba ami atu konstrui edifísiu foun, foin mak ami bele sai, ne’e konkordánsia ne’ebé parte rua aseita ona,” Diretór Eskola informa ba Agência TATOLI, iha Eskola São Miguel Arcanjo, Comoro, kinta ne’e.

Notísia relevante: Governu indemniza abitante afetadu 144 konstrusaun estrada Tasi-tolu, falta ualu

Aleinde hanesan eskola, edifísiu Eskola Colégio São Miguel Arcanjo iha instalasaun televizaun nasionál, TVE, ne’ebé ninia atividade programa televizaun daudaun ne’e provizóriumente iha Timor Plaza.

Armindo Crisna defende molok atu muda, Governu tenke transfere osan ba konta bankária eskola, hafoin kria kondisaun di’ak maka foin deside sai hosi edifísiu anteriór.

“Kompensasaun ne’ebé parte eskola sei simu hosi Governu hamutuk millaun $1,7, ne’ebé ami sei tau osan ne’e hamutuk ho fundu fundasaun hodi realiza konstrusaun foun ba eskola Colégio São Miguel Arcanjo inklui estasaun televizaun, ne’ebé la kleur tan Diresaun Terra Propriedade sei deside rai ba eskola,” atuál na’in ba TVE ne’e akresenta.

Maski nune’e, Governu liuhosi ministériu implementadór projetu halo ona pagamentu indemnizasaun faze datoluk ba abitante afetadu konstrusaun projetu estrada hosi Rotunda Comoro to’o Tasi-tolu hamutuk 144 maibé falta afetadu ualu mak seidauk inklui Eskola São Miguel Arcanjo.

Komunidade ne’ebé hela iha área konstrusaun estrada hetan impaktu maka’as ba projetu alargamentu estrada ne’e, enkuantu Eskola São Miguel Arcanjo la kona eskola tomak, maibé rai metru lima de’it.

Projetu estrada Rotunda Comoro to’o Tasi-tolu daudaun la’o ona, maibé área besik eskola paradu.

“Ami hein de’it bainhira Governu halo ona transferénsia osan ba konta bankária eskola nian maka ami bele hahú prepara kondisaun atu aselera prosesu balun. Maibé hakarak dehan osan kompensasaun ba eskola la konklui osan ba estasaun Televizaun São Miguel,” nia tenik.

Governu husu ba parte eskola atu buka fatin seluk hodi instala ekipamentu estasaun televizaun, hafoin selu.

“Fatin iha ona mak Timor Plaza, ne’ebé TVE bele kontinua serbisu durante tinan-ida hodi divulga informasaun ba públiku. Ami hatene uza de’it hodi halo serbisu, prosesu pagamentu Governu mak hatene ho Timor Plaza,” nia dehan.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here