Imajen/ FFTL

LIQUIÇA, 28 outubru 2021 (TATOLI)– Ekipa Timor -Leste ne’ebé lidera hosi Treinadór Prinsipal Fabio Joaquim Maciel da Silva, obrigadu tenke sofre 0-6 kontra adversáriu Korea Súl ne’ebé lidera hosi Treinadór Hwan Sun, iha jogu AFC CUP U23, iha estádiu Venue Jalan Besar Singapura.

Ho derrota ne’e Selesaun Nasionál Lafaek U23 iha esperansa mihis tebes atu ultrapasa ba jogu sira tuir mai tanba iha jogu primeiru kontra Singapura tenke fahe pontu ida ba malu ho empate 2-2.

Notisia Relevante: Kualifikasaun AFC CUP, Timor-Leste empate ho Singapura 2-2

Nune’e,  Jogu Ikus ba ekipa Lafaek kontra Filipina,  iha loron 31 outubru.  Timor -Leste tenke manán hodi bele iha esperansa atu ultrapasa ba jogu tuir mai.

Iha minutu primeiru hahú ekipa rua halo kedan kontra no atake ba malu tuir téknku no abilidade ekipa ida-idak nian, maibé Korea Súl hatudu jogu ofensivu ne’ebé ho tékniku bonitu.

Enkuantu Timor –Leste hala’o jogu ho defensivu makas iha liña kotuk ho intensaun atu halo empate jogu ne’e. Maibé intensaun la realiza tanba la konsege hala’o ho susesu.

Haree ba forsa ekipa Korea Súl ne’ebé makas halo defeza Timor-Leste la aguenta,  nune’e jogu la’o to’o iha minutu 30 jogadór Korea Súl  ho númeru kamizola 10 konsege fura ona rede Timor-Leste hodi muda rezultadu ba 1-0.

Jogu la’o liu de’it minutu ida iha minutu 31 jogadór Timor-Leste labele antisipa bola ho di’ak fó tan oportunidade ba jogadór Korea Súl ho númeru kamizola 2 halo tan golu ida muda rezultadu eskore 2-0.

Ho golu ne’ebé iha halo jogadór Timor-Leste nia mentalidade komesa monu. Hetok liután  ba minutu 33 jogadór númeru kamizola 10 hatama tan golu ida bainhira bola barullu iha liña oin Timor -Leste ho hatur eskore ba 3-0.

Maibé, Timor-Leste nafatin mantein jogu ho dignidade, maski lakon ona golu tolu, iha minutu 42 jogadór Elias Mesquita (7) lori bola livre to’o liña oin Korea Súl nian labele ezekuta oportunidade  tanba defeza Korea Súl  na’in rua habit lisuk Elias hodi falla atu halo golu.

Ho nune’e minutu primeira parte termina laiha tan golu ruma mak akontese no vitória provizóriu iha Korea nia liman tanba lidera ho golu tolu.

Semo ba segunda parte ekipa rua nafatin halo kontra no atake ba malu ho rítmu ne’ebé makas liu hodi duir bola hosi ain ba ain iha kampu kuadradu Singapura ne’e nia laran.

Maibé, ekipa Korea Súl kontinua hatudu jogu makas liu Timor-Leste hodi halo jogadór sira ekipa lafaek la hetan sorte halo golu.

Nune’e, iha minutu 50, jogadór Korea númeru kamizola 10 halo tan golu ida muda rezultadu ba 4-0.

Ekipa Korea-Sul hala’o jogu ho meiu kampu halo jogadór Timor-Leste sira labele domina bola, iha minutu 80, jogadór Korea númeru kamizola 9 halo tan golu ida dudu rezultadu ba 5-0.

Iha fali minutu 87, jogadór Korea númeru kamizola 13 halo golu ikus nune’e hametin kedas rezultadu ba 6-0 no to’o minutu termina Timor- Leste tenke hela ho derrota hodi hein jogu ikus kontra ekipa Filipina.

Notisia Relevante: Ekipa Timor-Leste prontu iha fíziku no tékniku kontra Korea Súl

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here