Diákonu na’in-rua hosi kongregasaun diosezana simu ordenasaun saserdotál. Imajen Tatoli/Celestina Teles.

COVALIMA, 28 outubru 2021 (TATOLI)—Bispu Dioseze Maliana, Don Norberto do Amaral,  kinta ne’e selebra ordenasaun saserdotál ba diakonu na’in-rua hosi kongregasaun diosezana sai Nai Lulik.

Bibi atan na’in-rua ne’e mak Padre João Guterres no Padre Francisco Indra do Nascimento Tey Seran. 

Selebrasaun liturjia ordenasaun saserdotál ne’ebé hala’o iha Igreja Parókia Nosa Senhora do Carmo Zumalai, ne’ebé hetan partisipasaun másimu hosi família diákonu na’in-rua nian, Bispu Dioseze Baucau Don Basílio do Nascimento, reprezentante Santa Sé Don Marcos, padre sira, diákonu, madre sira, seminarista no sarani sira hosi dioseze Maliana, Dili, Baucau.

“Ita agradese ba Maromak no ba família sira hasai sira-nia oan ho laran luak. Ita reza nafatin, agradese ba família sira, servisu ho susesu ordenasaun tuir dalan ne’ebè ita hotu hakarak. Simu ordenasaun nu’udar nai lulik hodi saran an servi Maromak no Santa Kreda nu’udar bibi-atan atu haklaken Nai Nia liafuan,” Bispu Dioseze Maliana, Don Norberto do Amaral, hateten iha nia ómilia.

Don Norberto do Amaral hateten, serimónia ordenasaun hanesan grasa Maromak Nian tanba ne’e agradese ba Maromak bele realiza serimónia ida-ne’e ho di’ak, ho sakramentu orden hodi transforma sira hodi sai kolaboradór Maromak nian.  

“Molok inaugurasaun Igreja Parókia Nossa Senhora do Carmo Zumalai katak mai uma hodi konvida ema. Zumalai ne’e katak konvida ema atu ita halibur malu hodi transforma ita-nia an hosi hahalok ne’ebè aat. Ohin Maromak konvida diákonu na’in-ra sai Nai Lulik hodi prontu servi Maromak no sarani sira sai bibi atan di’ak,” nia dehan. 

Padre Francisco Indra do Nascimento Tey Seran hateten, sai Kristu nia saseluk nu’udar instrumentuu Maromak nian, sai mediadór ema ho Maromak, tanba ne’e tenke ho Kristuu atu atua impersonál Kristu 

“La’ós lori ami-nia naran rasik, lori Kristu hanesan manu ain, hanesan São Baptista dehan ‘Nia mak sei sai boot no ha’u sei sai kiik’. Buat ne’ebè fó korajen halo ami na’in-rua laran metin mak ‘Ha’u mós horik iha imi-nia leet’. Ho fuan ne’ebè nakonu ho ksolok no rekuñese Nai Maromak nia grasa ne’ebè la nahas, atu ami bele serbi Nai iha ami nia moris tomak liu-liu iha knar saserdosiu ida-ne’e,” nia hateten. 

Jornalista : Celestina Teles

Editór      :  Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here