Distribuisaun bee-moos. Imajen/BTL, E.P

DILI, 29 outubru 2021 (TATOLI)-Vise-Prezidente Bee Timor-Leste, Empreza Públika (BTL, E.P), Gustavo da Cruz, hateten, ekipa kontinua halo melloramentu ba distribuisaun bee-moos ba komunidade iha territóriu nasionál, ne’ebé iha prosesu ne’e konsege tesi kotu kanu hosi uma-kain 400 dada bee ilegál.

“Ita-nia ekipa destaka iha zona distribuisaun bee 11 iha kapitál Dili inklui Hera kontinua halo melloramentu tesi kanu sira ne’ebé ema halo ligasaun dada bee ilegál hamutuk 400,” Vise-Prezidente informa ba Agência TATOLI, iha JL Villa, Fatuhada, sesta ne’e.

Notísia relevante: BTL,E.P kontinua halo melloramentu sistema bee-moos no saneamentu

Bainhira ekipa téknika tesi kotu kanu ilegál sira no haree hosi komunidade fura kanu distribuisaun, identifika katak laiha rekoñesimentu hosi entidade responsável hanesan BTL, E.P no bainhira iha ligasaun liuhosi tau mákina dada bee, implika ba vizinu sira la hetan bee, entaun empreza estatál ne’e tesi kotu no haruka infratór selu multa iha banku, tanba hanesan konsumidór hetan ona bee, iha obrigasaun atu kontribui ba nasaun liuhosi selu taxa.

“Ami halo avaliasaun katak iha fulan-rua nia-laran, setembru to’o outubru, ami halo melloramentu no haruka uma-kain 400 ne’ebé dada bee ilegál ba selu maibé sira razaun oioin, tanba ne’e husu ba konsumidór ne’ebé tau metru kontadór foun no mellora ona bee, halo favor ba selu,” nia fó hanoin.

Tuir dekretu-lei númeru 1/2004 kona-ba rejime distribuisaun bee públiku no diploma ministeriál númeru 1/2009 kona-ba tabela tarifáriu, define kustu ba konsumidór sira atu selu no ikus mak fiskalizasaun sistema públiku.

“Tanba ne’e, ema ne’ebé dada bee ilegál, tenke aplika multa hahú hosi $50 to’o $1.000, depende ba ninia gravidade komete irregularidade,” nia tenik.

Nune’e, Vise-Prezidente, husu ba komunidade ne’ebé dada bee ilegál no  BTL hadi’a ona tenke selu taxa no labele komete filafali erru ne’ebé halo ona, nune’e bele kontribui ba maluk sira ne’ebé bee laiha no BTL bele kontinua mellora sistema bee ba área ne’ebé oras ne’e daudaun komunidade halerik hela ba bee-moos.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here