Bee-moos. Imajen/Espesiál

DILI, 28 outubru 2021 (TATOLI)–Governu liuhosi Bee Timor-Leste, Empreza Públika (BTL, E.P), iha kinta ne’e, entrega sertifikadu apresiasaun ba funsionáriu BTL na’in-26, ne’ebé termina ona formasaun durante fulan-tolu iha área tratamentu bee iha estasaun tratamentu sira no kualidade bee ba konsumu públiku.

Vise-Prezidente BTL, E.P, Gustavo da Crus, hateten, formasaun ne’e pertinente ba funsionáriu, maski la’ós buat foun ba sira.

“Ida-ne’e atu hasa’e koñesementu atubele tau importánsia ba prosesu tratamentu no garante kualidade bee molok distribui ba komunidade, ne’ebé ninia rezultadu teste laboratóriu tuir estandar ne’ebé estabelese ona iha dekretu-lei númeru 31/2020, kona-ba bee-moos ba konsumu públiku tenke kualidade,” Vise-Prezidente empreza estatál ne’e hateten ba Agência TATOLI,  iha JL-Villa, Fatuhada.

Notísia relevante: BTL,E.P kontinua halo melloramentu sistema bee-moos no saneamentu

Funsionáriu na’in-26 ne’ebé ohin termina ona formasaun, nu’udar operadór munisípiu Dili, ne’ebé ba oin sei destaka iha área hanesan Manleuana, Comoro, sentrál Colmera, Lahane, Bidau no Hera.

Matéria ne’ebé partisipante formasaun sira hetan, atu asegura no garante bee-moos ne’ebé oferese ba komunidade  iha prosesamentu importante sistema bee rua ne’ebé eziste iha Timor-Leste, hanesan bee gravitasaun iha rai-leten no bee sutranu iha rai-okos.

“Bee rua nia kualidade diferente ho ninia espesifikasaun ba kontaminasaun sira, entaun formasaun ne’e gia sira hatene loloos, se halo tratamentu bee hosi rai leten, liuhosi saida no prosesu saida mak foin fornese, ezemplu bee hosi mota sira molok tama ba rezervatóriu, tenke liuhosi etapa hira no etapa dahuluk ne’e atu tau saida no daruak ne’e atu foti amostra oinsá, deteta katak bee ne’e ho nia kualidade tau aimoruk tuir nia kadar,” nia akresenta.

Timor-Leste iha tipu aimoruk rua ne’ebé uza ba bee, ne’ebé aimoruk ne’e funsionáriu tenke tau tuir liuhosi rezultadu teste ida, nune’e tau bee tuir nia kadar.

“Aimoruk klorin ne’ebé ita uza, maski kímiku maibé la’ós atu estraga ita-nia saúde, nia hamate baktéria maski nia iis maibé garante katak la fó impaktu ba ema-nia saúde” Vise-Prezidente BTL, E.P  hateten.

Iha fatin hanesan, funsionáriu BTL, E.P Abílio Araujo da silva, ne’ebé ohin simu sertifikadu apresiasaun, agradese tanba bele fasilita sira hasa’e koñesementu iha serbisu bee, nune’e bele maneja bee-moos no kahur aimoruk ba bee.

“Ami-nia formasaun kona-ba servisu tratamentu ne’ebé di’ak ba bee liuhosi uza aimoruk, oinsá ami hatene bee ne’e mai hira no tau aimoruk hira, nune’e bee to’o ba komunidade ne’e ijene, no iha laboratóriu halo análiza tuir padraun hosi World Health Organization (WHO), ne’ebé mak haruka mai tanba aimoruk ne’ebé ita uza atu oho baktéria, bainhihra ita uza tenke tuir nia regra, nune’e labele fó impaktu ba komunidade,” nia dehan.

Tanba ne’e, partisipante formasaun ne’e husu ba Governu atu kontinua realiza formasaun hanesan, nune’e hasa’e liutan kapasidade.

Atividade ne’e hanesan pakote hosi projetu programa Water Rapid Repair ne’ebé hetan fundu hosi Governu Austrália no implementa hosi PARTISIPA, EWB no Cardno.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here